Tiranë – Kryetari i Partisë Demokratike, Sali Berisha, ka reaguar sërish për çështjen e Vlora Hysenit, duke akuzuar kryeministrin Edi Rama se po përpiqet të distancohet nga drejtuesja e SHISH dhe nga marrëdhëniet e saj me persona të përfshirë në hetime.

Reagimi erdhi pak orë pasi dolën në media mesazhet e përgjuara që i gjeni këtu dhe këtu.

Në një deklaratë për mediat, Berisha pretendoi se Rama po tenton ta paraqesë çështjen si një raport personal të Hysenit, ndërsa sipas tij, vendimet e saj janë marrë me dijeninë dhe porosinë e kryeministrit.

“Përpiqet ta paraqesë sot me ca transkripte si një aferë dashurie. E vërteta është se Vlora Hyseni çdo hap, çdo vendim e ka bërë me dijeni dhe porosi të Edi Ramës”, deklaroi Berisha.

Kreu i PD-së iu referua gjithashtu komunikimeve të përmendura në materialet e çështjes, duke veçuar një frazë ku flitet për pritjen e një porosie nga “kryeministri”. Sipas interpretimit të Berishës, kjo përforcon pretendimin e tij se vendimmarrja e Hysenit nuk ishte e pavarur.

Berisha hodhi akuza të forta edhe ndaj mënyrës se si, sipas tij, është drejtuar SHISH gjatë kësaj periudhe, duke pretenduar se institucioni është vënë në funksion të interesave kriminale. Këto janë akuza politike të opozitës dhe nuk përbëjnë në vetvete përfundime të organeve të drejtësisë.

Çështja e Vlora Hysenit ka marrë përmasa të forta politike pas masës së sigurisë ndaj saj dhe hetimeve që lidhen me dosjen ku përmendet edhe Ergys Agasi. Berisha ka kërkuar prej ditësh që përgjegjësia politike të shkojë deri te kryeministri Rama. /noa.al

Deklarata e plotë:

Shqiptarët çdo ditë njihen me një kapitull gjithnjë e më të zi të narkoshtetit të instaluar në Shqipëri.

Dokumentet e fundit zyrtare gjyqësore, të cilat faktojnë se Edi Rama ka vendosur në funksion të karteleve të drogës dhe mafies, Shërbimin Informativ Kombëtar, kreun e këtij shërbimi.

E krahasojnë Shqipërinë me asnjë vend tjetër në Evropë.

E krahasojnë Shqipërinë me Guinea Bisaun, të cilën kartelet mizore të drogës të Amerikës Latine e shndërruan në narkoshtetin e parë dhe të vetëm në Afrikë.

Historiku i kësaj mostre, që në kod, ligj dhe në Kushtetutë kishte detyrim sigurinë kombëtare dhe sigurinë e qytetarëve shqiptarë, është tipik në përzgjedhje, në qëndrime i një padrinoje.

Edi Rama merr një person të shkarkuar nga detyra nga Shërbimi Inteligjent i Kosovës dhe e emëron në një akt të pashembullt në histori në krye të SHISH.

Për të njëjtat motive që kjo, mund t’i vësh çdo epitet, por nuk dua që ta rëndoj gojën sepse rasti është më i turpshmi në histori, mediat e botës kanë dy lajme kryesore që ta dini, sigurisht kanë fjalimin e presidentit Donald Trump në OKB, por sigurisht në të katër anët e botës është edhe lajmi i Vlora Hysenit. Lajmi i turpshëm i Vlora Hysenit!

Edi Rama, sapo u bë publik skandali, sepse ju duhet të jeni të sigurt se ai ka qenë i informuar, ai dhe jo vetëm ai, urdhër arresti për drejtuesen e SHISH, shërbim që funksionon në një sistem bashkëpunimi të ngushtë në kuadrin e NATO-s, shërbim që në traditën e tij, ka një bashkëpunim të ngushtë me partnerët tanë më kryesorë në fushën e sigurisë, shërbim real dhe me kontribute të pamohueshme.

Pra, përpiqet ta paraqesë sot me ca transkripte si një aferë dashurie (love affair).

E vërteta është se Vlora Hyseni çdo hap, çdo vendim e ka bërë me dijeni dhe porosi të Edi Ramës.

Lexoni transkriptin, pres nesër nga Skënderi se mos ka ndonjë porosi nga kryeministri.

Kryeministri, porositë Skënderit do ia jepte për Agasin. Për gjë tjetër nuk ka pse merrte shefja e shërbimit porosi nga Skënderi.