TIRANË — Detaje të reja nga fashikulli hetimor i Prokurorisë së Posaçme Antikorrupsion (SPAK) zbulojnë se ish-drejtuesja e Shërbimit Informativ të Shtetit, Vlora Hyseni, informonte në mënyrë të vazhdueshme biznesmenin Ergys Agasi për axhendën e saj zyrtare dhe takimet e nivelit të lartë shtetëror.

Nga këqyrja e komunikimeve elektronike të sekuestruara nga hetuesit, rezulton se Hyseni i raportonte Agasit për takimet e saj konfidenciale me Kryeministrin Edi Rama, si dhe për kontaktet me drejtuesit e institucioneve të zbatimit të ligjit e përfaqësuesit e partnerëve ndërkombëtarë.

Në një prej mesazheve të administruara në dosjen hetimore, Vlora Hyseni e njoftonte Ergys Agasin për takimin e radhës me kreun e qeverisë duke i shkruar:

“Nesër duhet ta takoj km ne 8:30”

Në një tjetër komunikim të zbardhur nga organet e drejtësisë, ajo i shkruante sërish Agasit lidhur me një ftesë për takim të marrë nga drejtuesi i policisë, Skënder Hita:

“Skënderi më thirri me u taku të hënën … Te shpresojmë që ka porosit km…”

Këto transkripte përbëjnë një pjesë të provave kyçe mbi të cilat Gjykata e Posaçme caktoi masën e sigurisë “arrest në shtëpi” dhe pezullimin nga detyra për Hysenin, nën dyshimet për nxjerrje të të dhënave sekrete shtetërore dhe përkrahje të autorit të krimit.