“Dëgjuam zhurma, u frikësuam shumë. Tentuan të hapin derën, por nuk arritën se njoftuam policinë. Na shpëtoi llozi që kishim vënë mbrapa derës”.

Kështu tha për gazetarët Elsa Muça, duke treguar momentet e tmerrit ku katër persona të armatosur tentuan të grabisin banesën e saj.

Ngjarja ndodhi rreth orës 03.00 të mëngjesit të kësaj të premteje, ku katër persona tentuan të vjedhin banesën e Minella dhe Elsa Muçës, në lagjen “29 Nëntori” Fier, duke thyer drynin e derës.

Gjatë tentativës së grabitjes, nga shkëmbimi i zjarrit me policinë mbeti i vrarë një nga të dyshuarit dhe u plagos një tjetër.

Në momentin e ngjarjes në banesë ndodhej vetëm çifti Muça, të cilët pasi pikasën hajdutët dhe lajmëruan policinë. E njoftuar nga telefonata, policia mbërriti në vendin e ngjarjes ku u përball me disa persona të maskuar e të armatosur me pistoleta e automatikë, të cilët qëlluan me armë zjarri në drejtim të punonjësve të policisë.

Në kushtet e reagimit propocional, policia thotë se, nga shkëmbimi i zjarrit, njëri nga autorët është plagosur dhe një tjetër ka gjetur vdekjen.

Të dy ata ishin të maskuar e të armatosur me pistoleta, të cilat u sekuestruan në cilësinë e provës materiale.

Autorët e tjerë, që dyshohet se janë edhe dy, duke qëlluar në drejtim të punonjësve të policisë janë larguar duke përfituar nga errësira dhe kushtet e motit, me një mjet ende të paidentifikuar.

Për kapjen e të dyshuarve janë ngritur pika të shumta kontrolli në të gjitha hyrje-daljet e qytetit dhe po vijon puna për kapjen e autorëve të tjerë.

Në vendin e ngjarjes janë sekuestruar një numër i konsiderueshëm provash materiale.

Nën drejtimin e një grupi të posaçëm të Prokurorisë, i cili gjendet në vendngjarje, po vazhdon puna për dokumentimin e plotë të kësaj ngjarje, për identifikimin e viktimës si dhe për kapjen e të dyshuarve të tjerë

Deri më tani është identifikuar vetëm person që mbeti i plagosur gjatë tentativës së grabitjes, si pasojë e shkëmbimit të zjarrit me policinë. Ai është Arben Muça 37 vjeç, i cili ndodhet në gjendje të rëndë në spitalin e Fierit, si pasojë e plagëve të marra.

Ndërkohë, vijon të jetë ende i paidentifikuar, personi që mbeti i vrarë. /a.y/noa.al

Tentativa e grabitjes me një të vrarë në Fier, kush është i plagosuri

Një i vrarë dhe një i plagosur në Fier, kush është familja që u tentua të grabitet

Tentativa e grabitjes përfundon në përplasje me armë, vritet një nga të dyshuarit, plagoset tjetri