Shpërthimi në Elbasan vrau një person, shumë të asfiksuar mes tyre fëmijë

Një ngjarje e rëndë ka tronditur mesditën e sotme qytetin e Elbasanit, ku një shpërthim i fuqishëm në një pallat në lagjen “Beqir Dardha” i ka marrë jetën një 83-vjeçareje.

Viktima është Hatixhe Berisha, 83 vjeçe, banore e lagjes "Beqir Dardha" në Elbasan ku ndodhi ngjarja, raporton noa.al.

Nga informacionet e fundit rezulton se viktima nuk ndodhej brenda apartamentit ku ndodhi aksidenti, por u prek nga pasojat e shpërthimit që shkaktoi dëme të mëdha materiale, përfshirë shembjen e mureve dhe dëmtimin e strukturës së shkallëve të ndërtesës.

Përveç viktimës, bilanci i ngjarjes përfshin edhe 10 persona të asfiksuar nga tymi i dendur, të cilët ndodhen jashtë rrezikut për jetën.

Forca e madhe e shpërthimit shkaktoi panik të madh te banorët e zonës, ndërsa shërbimet zjarrfikëse, policia dhe emergjencat civile ndërhynë me shpejtësi për evakuimin e të gjithë banorëve përmes shkallëve të emergjencës.

Sipas të dhënave paraprake, shkak për shpërthimin tragjik dyshohet të jetë bërë një bombol gazi brenda banesës.

Ndërkohë, grupet hetimore dhe ekspertët e lëndëve plasëse po vijojnë punën në vendngjarje për përcaktimin e plotë të shkaqeve dhe rrethanave teknike që çuan në këtë aksident.