PËRDITËSIM/ Vdekja e 16-vjeçarit në restorantin e Fushë-Krujës, policia: E shtyu kamerieri, arrestuam dhe pronarin e lokalit. Emrat

Tragjedi në restorantin e Fushë-Krujës, kamerieri shtyu 16-vjeçarin brenda ashensorit, arrestohet edhe pronari i lokalit.

Policia e Krujës ka arrestuar dy persona lidhur me ngjarjen e rëndë të ndodhur më 11 tetor 2026, në fshatin Arrameras.

Sipas njoftimit zyrtar, në pranga ka rënë E. S., 26 vjeç, kamerier në restorant, i dyshuar për veprën penale “Vrasja nga pakujdesia”.

Nga hetimet paraprake dyshohet se 26-vjeçari ka shtyrë me duar brenda ashensorit një 16-vjeçar, i cili ishte gjithashtu i punësuar si kamerier në të njëjtin lokal.

Pas këtij veprimi, ashensori është shkëputur, duke shkaktuar humbjen e jetës së të miturit.

Në pranga ka përfunduar edhe pronari i restorantit, A. V., 62 vjeç, i cili akuzohet për veprat penale “Shkelja e rregullave të mbrojtjes në punë” dhe “Fshehja e të ardhurave”.

Arrestimi i pronarit lidhet me dyshimet për shkelje të rregullave të sigurisë në ambientet e punës, ndërsa autoritetet kanë evidentuar edhe dyshime për shkelje financiare.

Materialet procedurale i janë referuar Prokurorisë për veprime të mëtejshme, ndërsa hetimet vijojnë për zbardhjen e plotë të rrethanave të ngjarjes.

Çfarë tha policia

Specialistët e Komisariatit të Policisë Krujë arrestuan në flagrancë shtetasit:

-E. S., 26 vjeç, për veprën penale “Vrasja nga pakujdesia”;

-A. V., 62 vjeç, për veprat penale “Shkelja e rregullave të mbrojtjes në punë” dhe “Fshehja e të ardhurave”.

Arrestimet u kryen pasi dyshohet se më datë 11.10.2026, në fshatin Arrameras, Fushë Krujë, në restorantin në pronësi të shtetasit A. V., shtetasi E. S., kamerier i lokalit, ka shtyrë me duar një 16-vjeçar (i punësuar kamerier në lokal), brenda në ashensor, dhe si pasojë e shkëputjes së ashensorit, 16-vjeçari ka humbur jetën.

Materialet procedurale iu referuan Prokurorisë, për veprime të mëtejshme.