Detaje të rënda nga ngjarja në Fushë-Krujë! Policia zbulon veprimin që dyshohet se i parapriu shkëputjes së ashensorit ku humbi jetën i mituri. Arrestohen kamerieri dhe pronari i restorantit

Fushë Krujë – Detaje të reja janë zbardhur nga ngjarja tragjike në një restorant në Fushë-Krujë, ku një 16-vjeçar humbi jetën pas shkëputjes së një ashensori.

Policia e Krujës ka arrestuar dy persona lidhur me ngjarjen e rëndë të ndodhur më 11 tetor 2026, në fshatin Arrameras.

Sipas njoftimit zyrtar, në pranga ka rënë Endri Stafuka, 26 vjeç, kamerier në restorant, i dyshuar për veprën penale “Vrasja nga pakujdesia”.

Nga hetimet paraprake dyshohet se 26-vjeçari ka shtyrë me duar brenda ashensorit një 16-vjeçar, i cili ishte gjithashtu i punësuar si kamerier në të njëjtin lokal.

Pas këtij veprimi, ashensori është shkëputur, duke shkaktuar humbjen e jetës së të miturit.

Në pranga ka përfunduar edhe pronari i restorantit, Afrim Vathi, 62 vjeç, i cili akuzohet për veprat penale “Shkelja e rregullave të mbrojtjes në punë” dhe “Fshehja e të ardhurave”.

Arrestimi i pronarit lidhet me dyshimet për shkelje të rregullave të sigurisë në ambientet e punës, ndërsa autoritetet kanë evidentuar edhe dyshime për shkelje financiare.

Materialet procedurale i janë referuar Prokurorisë për veprime të mëtejshme, ndërsa hetimet vijojnë për zbardhjen e plotë të rrethanave të ngjarjes. /noa.al