Përditësim: Emri, kush është i dyshuari që i vuri flakën Big Marketit

I vënë flakën Big Market, policia e Elbasanit: Punonjësit u rrezikuan, ja pamjet e autorit duke ndezur zjarrin

Një supermarket i rrjetit Big Market në qytetin e Cërrikut është përfshirë nga flakët mëngjesin e kësaj të enjteje, pas një zjarrvënieje të qëllimshme që ka vënë në rrezik jetën e punonjësve që ndodheshin brenda ambienteve të subjektit.

Ngjarja ka ndodhur rreth orës 07:30 të datës 8 tetor 2026, në lagjen nr. 3 të qytetit, raporton noa.al.

Sipas Policisë së Elbasanit, zjarri është vënë qëllimisht, duke shkaktuar djegien e produkteve dhe duke rrezikuar punonjësit e supermarketit.

Pas marrjes së njoftimit, shërbimet e Komisariatit të Policisë Cërrik kanë mbërritur në vendngjarje dhe kanë nisur hetimet për identifikimin e autorit.

Pas veprimeve operative dhe procedurale, policia ka arritur të zbardhë ngjarjen brenda pak orësh, duke identifikuar, lokalizuar dhe arrestuar autorin e dyshuar.

Në pranga ka rënë shtetasi A. M., 45 vjeç, banues në Cërrik, i dyshuar si personi që i ka vënë flakën supermarketit.

Policia konfirmon se nga zjarri janë shkaktuar dëme materiale, ndërsa punonjësit që ndodheshin në ambientet e biznesit kanë qenë të rrezikuar nga flakët.

Materialet procedurale i janë referuar Prokurorisë së Elbasanit për veprime të mëtejshme, ndërsa 45-vjeçari do të hetohet për veprën penale “Shkatërrimi i pronës me zjarr”.