Lavrio, Greqi – “Ndihesha i tradhtuar. Për një kohë të gjatë shihja një burrë tjetër të jetonte në shtëpinë time, bashkë me fëmijët e mi, dhe të flinte në krevatin tim”.

Këto janë disa nga deklaratat që 32-vjeçari i akuzuar për sulmin me thikë ndaj ish-bashkëshortes dhe partnerit të saj në Lavrio të Greqisë mësohet të ketë bërë gjatë dëshmisë përpara hetuesve.

Ngjarja e rëndë, e cila është raportuar më herët, ka marrë një zhvillim të ri, pasi gjykata ka vendosur që 32-vjeçari të qëndrojë në paraburgim.

Sipas mediave greke, gjatë dëshmisë së tij, i akuzuari është përpjekur të shpjegojë rrethanat që e çuan drejt sulmit, duke pretenduar se në momentin e ngjarjes nuk ishte në gjendje të mirë psikologjike dhe fizike.

Pavarësisht pretendimeve të tij, prokurori dhe hetuesi kanë rënë dakord për caktimin e masës së paraburgimit.

Ndaj 32-vjeçarit janë ngritur disa akuza të rënda, mes tyre dy tentativa vrasjeje me dashje, armëmbajtje dhe përdorim i paligjshëm i armës së ftohtë, dëmtim i pronës së tjetrit dhe shkelje e masave kufizuese.

Fotot: I dyshuari sot para gjykatës

Pas vendimit, ai pritet të transferohet në një institucion penitenciar, ndërsa çështja do të vijojë shqyrtimin në drejtësinë greke. /noa.al