TIRANË — Një ngjarje e rëndë është regjistruar në zonën e Alliasit në Tiranë, ku 36-vjeçari Gerald Sefa ka humbur jetën pasi është hedhur nga kati i pestë i një ndërtese banimi.

Në lidhje me këtë ngjarje, shërbimet e policisë kanë arrestuar shtetasin Sajmir Demiri, babai i ish-bashkëjetueses së viktimës, nën akuzën e shkaktimit të vetëvrasjes, konfirmon noa.al nga burime të Policisë së Shtetit.

Hetimet paraprake kanë zbardhur se dy ditë përpara ngjarjes, Sajmir Demiri është përfshirë në një konflikt me 36-vjeçarin, duke i kërkuar llogari për ndarjen nga e bija.

Debatet dhe presioni i ushtruar prej tij konsiderohen nga grupi hetimor si pista kryesore që çoi viktimën drejt aktit ekstrem.

Gjatë këqyrjes së vendngjarjes në banesën e pronësuar nga një familjar i Sefës, hetuesit gjetën një thikë me njolla gjaku, çka ngriti fillimisht dyshime për vrasje.

Megjithatë, ekspertiza shkencore provoi praninë e gjurmëve të gishtave të vetë Gerald Sefës në armën e ftohtë, duke ngritur dyshimin se ai kishte tentuar fillimisht vetëdëmtimin përpara se të ndërmerrte aktin fatal.

Këqyrja e pamjeve të kamerave të sigurisë të vendosura në hyrje të pallatit ka dokumentuar se 36-vjeçari ka hyrë i vetëm në ndërtesë, element ky që mbështet dinamikën e vetëvrasjes nën presionin e konfliktit familjar. Grupi hetimor po vijon punën për dokumentimin e plotë ligjor të çështjes.