Nga pasioni për artet marciale te puna si bukëpjekës, kush ishte Altini që tronditi mbarë Greqinë

Pozonte me armë, ekspozonte aftësitë e tij në artet marciale dhe publikonte në rrjetet sociale tufa me kartëmonedha 50-euroshe. 48-vjeçari me origjinë shqiptare vrau me gjakftohtësi ish-partneren e tij, nënë e një vajze të mitur.

“(Disa) burra janë kriminelë. Nuk janë njerëz. Janë… çfarë të them?”, tha motra e 45-vjeçares së vrarë.

Vëllezërit dhe motrat e 45-vjeçares Melina (Luljeta Obzova), duke folur për “Live News”, konfirmojnë se viktima dhe autori kishin pasur një lidhje dhe se, kur gruaja vendosi së fundmi t’i jepte fund marrëdhënies, 48-vjeçari nuk e pranoi ndarjen dhe nisi t’ia kthente jetën në ferr.

“Dhe unë i thashë: ‘Melina, dëgjo, duhet të shkosh ta denoncosh, sepse kjo çështje është shumë serioze’. Më pas ai i kishte dërguar një fotografi të një revolveri të drejtuar në ballë, duke i thënë se ‘me këtë do të të vras edhe ty’.”

E kishte kthyer në zakon keqtrajtimin e grave

Për autorin, i cili më pas vrau veten, nuk ishte hera e parë që bëhej i dhunshëm me gratë që kishte në krah. Në vitin 2016, kur ndodhej ende në Shqipëri, ishte akuzuar se ngacmonte ish-bashkëshorten e tij, pasi nuk e pranonte ndarjen e tyre.

Raportimet shqiptare të asaj periudhe janë domethënëse:

“Policia e Tiranës arrestoi një 35-vjeçar me akuzën e ngacmimit. Ai i kërkonte ish-bashkëshortes të kthehej me të, por ajo refuzonte. 35-vjeçari nisi të dilte në rrugë për ta parë, e telefononte, i shkruante në rrjetet sociale dhe madje e kërcënonte. Situata u bë e padurueshme dhe kështu 31-vjeçarja iu drejtua Policisë.”

Për këtë episod, kishte raportuar dhe noa.al:

…35- vjeçari Altin Allmuça u arrestua ditën e djeshme nga policia e Tiranës, pas denoncimit të bërë nga ish- bashkëshortja e tij.

E.M., 31 vjeçe u paraqit në polici duke denoncuar Allmuçën se në kohë dhe në vende të ndryshme, e ka përndjekur, duke i shkaktuar ankth dhe frikë. Gjithçka ka nisur pas përfundimit të martesës mes tyre duke bërë që 35- vjeçari të kërcënojë ish- gruan, duke mos pranuar përfundimin e lidhjes. Ai kishte arritur deri atje sa ta kërcënonte, duke i thënë se nuk do e lejonte të rindërtonte jetën dhe se ajo i përkiste vetëm atij.

Rrëfehet shoku i Altinit

“Më duket sikur po flasim për një person krejt tjetër. Jam shokuar nga e gjithë kjo histori dhe vërtet është sikur të mos e njoh, sikur të jetë dikush tjetër.

Sa u përket raportimeve nga Shqipëria, akuzat janë të rreme, sepse ky njeri është prej rreth 30 vitesh në Greqi. Në vitin 2005 u martua me gruan e tij dhe e solli në Greqi.

Në vitin 2007 patën fëmijën e tyre, një vajzë që sot është 19 vjeçe. Ai punonte si bukëpjekës. Shpesh gruaja e tij me vajzën shkonin vetëm në Shqipëri për të vizituar prindërit”, tha kumbara e autorit.

Siç duket, historia përsëritet 10 vjet më vonë. Vetëm se këtë herë kërcënimet u kthyen në realitet dhe 48-vjeçari e ekzekutoi me gjakftohtësi ish-partneren e tij, me një plumb në kokë, dhe më pas vrau veten.

Ishte baba i një vajze

Imazhi që ai shfaqte përpara të tjerëve ishte krejtësisht ndryshe. Që kur kishte ardhur në Greqi, ishte rimartuar dhe kishte krijuar familje. Dukej si një familjar dhe një njeri punëtor.

Sipas informacioneve, bashkëshortja e tij aktuale dyshohet se u ka deklaruar autoriteteve se nuk dinte asgjë për marrëdhënien e tij me 45-vjeçaren.

“Ishte familjar. Na thoshte se gruaja e tij punonte gjithashtu në turn nate, mendoj në një lokal ku shërbehej mish i pjekur apo diçka e tillë, dhe se kishin një vajzë. Nga puna tek ne u largua për çështje orari, sepse nuk donte të punonte natën dhe dëshironte të punonte në mëngjes, që të kishte pak më shumë kontroll në shtëpi dhe të ndihmonte fëmijën e tij. Nuk sillej si i fortë apo si arrogant. Ishte edhe zotëri”, tha punëdhënësi i 48-vjeçarit.

I apasionuar pas arteve marciale, ai publikonte shpesh video nga stërvitjet e tij.

“Kishte një prirje për t’u dukur pak, në kuptimin që donte të mësonte këtë teknikë, pastaj një tjetër, të bënte këtë e atë”, tha një trajner i Krav Maga-s.

Profili i 45-vjeçares

Policia po mbledh dëshmi nga familjarët dhe miqtë, duke i dhënë rëndësi të veçantë dëshmisë së vajzës së 45-vjeçares, për të sqaruar marrëdhënien mes tyre dhe shkaqet e vrasjes.

Ajo ishte një grua shumë punëtore, nënë e një fëmije, që luftonte çdo ditë për të siguruar jetesën.

45-vjeçarja dyshohet se kishte kërkuar ndihmë nga familja e saj dhe madje kishte ndërruar edhe bravat e shtëpisë, por asgjë nuk rezultoi e mjaftueshme për të parandaluar një tjetër vrasje të një gruaje.