TIRANË – Partia Socialiste ka hartuar raportin përfundimtar prej 357 faqesh për Reformën Territoriale, i cili parashikon katër skenarë të mundshëm për riorganizimin e njësive të qeverisjes vendore në vaftë të zgjedhjeve të ardhshme lokale, pa përcaktuar ende një hartë apo numër fiks bashkish.

Sipas dokumentit zyrtar, katër skenarët e propozuar përfshijnë:

Decentralizimin asimetrik: Ruajtjen e numrit aktual të bashkive me kompetenca të përshtatura.

Bashkimet e mëdha: Krijimin e bashkive me sipërfaqe më të mëdha, të cilat ushtrojnë të gjitha funksionet publike.

Bashkimet e shkallës së mesme: Rialokimin e funksioneve plotësuese mes nivelit qendror dhe vendor.

Bashkitë me funksione bazë: Përqendrimin e njësive vendore vetëm te shërbimet thelbësore.

Pavarësisht skenarit që do të zgjidhet, raporti evidenton tre prioritete kryesore: qartësimin e funksioneve që ushtrohen pjesërisht nga pushteti qendror, ndarjen e saktë të kompetencave dhe ridizajnimin e sistemit të barazimit fiskal për të shmangur nënfinancimin e shërbimeve.

Dokumenti vë theksin te lidhja mes madhësisë së bashkive dhe autonomisë së tyre financiare, duke nënvizuar se thjesht bashkimi i njësive me ekonomi të dobët nuk garanton fuqizim financiar.

Në këtë kuadër, raporti analizon edhe varësinë e lartë të pushtetit vendor nga grantet e qeverisë qendrore. Ndërsa Tirana regjistron varësinë më të ulët me vetëm 22%, e ndjekur nga Vlora e Saranda (25%) dhe Durrësi (39%), bashki të tilla si Hasi (1.053%), Pusteci (1.099%) dhe Këlcyra (1.255%) shfaqin varësi kritike nga fondet e buxhetit të shtetit.

Për të lexuar raportin klikoni në linkun më poshtë:

PS reforma administrativo-territoriale