TIRANË – Partia Demokratike ka reaguar pas deklaratave të Komisioneres së BE-së për Zgjerimin, Marta Kos, e cila është shprehur se qeveria shqiptare ka dhënë garanci për përputhshmërinë e projekteve në zonat e mbrojtura me rregullat në fuqi.

Në reagimin e saj, Partia Demokratike e konsideron këtë deklaratë të bazuar në informacione të pasakta, duke pretenduar se ato janë përcjellë nga kryeministri Edi Rama dhe nuk pasqyrojnë realitetin në vend.

Sipas PD-së, deklarata e Komisioneres “injoron krizën e rëndë” që, sipas saj, po përjeton Shqipëria dhe nuk kontribuon në zgjidhjen e situatës, por përkundrazi e thellon atë.

Në qëndrimin zyrtar, Partia Demokratike thekson gjithashtu mbështetjen për pesë kërkesat e protestuesve, të cilat i konsideron si kushte për një zgjidhje paqësore të krizës.

Deklaratë e Partisë Demokratike

Lidhur me Deklaratën e Komisioneres për Fqinjësinë dhe Zgjerimin, zonjës Marta Kos, për krizën e rëndë që po kalon vendi ynë, Partia Demokratike shpreh shqetësimin dhe thekson se ajo është e bazuar në informacionet e rrejshme paraqitur nga miku i saj Edi, dhe jo në realitetin ekzistues në vend.

Ajo deklaratë injoron krizën e rëndë që ka mbërthyer Shqipërinë dhe i shërben Edi Ramës dhe jo zgjidhjes së krizës, përkundrazi e acaron dhe e thellon edhe më shumë.

Partia Demokratike mbështet plotësisht 5 kërkesat e drejta të protestuesve si kushte për zgjidhjen paqësore të krizës.