Vdekja e elektricistit në Lezhë, 4 punonjës të OSHEE-së në hetim për shpërdorim detyre

Pas ngjarjes së rëndë të regjistruar në fshatin Rrilë të Lezhës, ku një punonjës i OSHEE-së humbi jetën gjatë kryerjes së detyrës, Prokuroria e Lezhës ka nisur procedim penal ndaj katër personave për veprat penale “Shkelja e rregullave të mbrojtjes në punë” dhe “Shpërdorimi i detyrës”.

Shtetasi M. P., me detyrë elektricist në OShEE, dyshohet se humbi jetën si pasojë e kontaktit me rrymën elektrike, gjatë riparimit të një defekti në një shtyllë elektrike në fshatin Rrilë.

Në vijim të veprimeve procedurale të kryera nga oficerët e Policisë Gjyqësore të Prokurorisë së Lezhës, është nisur procedimi penal ndaj:

M. L., 34 vjeç, me detyrë inxhinier elektrik në OShEE; K. Ll., 60 vjeç, me detyrë elektricist; A. Xh., 62 vjeç, me detyrë elektricist; E. R., 23 vjeç, me detyrë elektricist.

Sipas njoftimit zyrtar, hetimet po vijojnë për zbardhjen e plotë të rrethanave të ngjarjes dhe për sqarimin e përgjegjësive të mundshme lidhur me rastin.

Materialet procedurale i janë referuar Prokurorisë së Lezhës për veprime të mëtejshme.