Tiranë, 27 janar 2026 – Një shtetas i shpallur në kërkim ndërkombëtar për vrasje të trefishtë në Maqedoninë e Veriut është arrestuar nga Policia e Shtetit në zonën e Liqenit të Thatë, në kryeqytet.

I arrestuari është identifikuar si Besim Sherifi, 52 vjeç, i cili dyshohet se ishte fshehur në Tiranë prej rreth 10 vitesh. Sipas burimeve policore, ai përdorte identitet të rremë, duke u paraqitur si shtetas kosovar, ndërsa dokumentet e sekuestruara gjatë arrestimit dyshohet se janë të falsifikuara.

Operacioni u krye pas informacioneve operative të siguruara rreth dy muaj më parë, sipas të cilave një person i skeduar për vrasje ndodhej në një apartament me qira në zonën e Liqenit të Thatë. Pas verifikimeve dhe shkëmbimit të informacionit me autoritetet e Maqedonisë së Veriut, u konfirmua se Sherifi ishte i shpallur në kërkim ndërkombëtar.

Gjatë ndërhyrjes së forcave operacionale, 52-vjeçari ka mohuar identitetin dhe akuzat, por verifikimi i gjurmëve të gishtërinjve konfirmoi se bëhej fjalë për personin e kërkuar.

Besim Sherifi akuzohet për një ngjarje të ndodhur në vitin 2007 në fshatin Kopanicë, në zonën e Shkupit, ku mbetën të vrarë tre persona. Për këtë çështje, ndaj tij ishte vendosur masa e arrestit në burg në mungesë, ndërsa sipas legjislacionit penal të Maqedonisë së Veriut, vepra penale parashikon dënim me burgim të përjetshëm.

Autoritetet shqiptare po ndjekin procedurat ligjore për ekstradimin e tij.

Çfarë ndodhi më 5 tetor 2007

Në Kopanicë të Shkupit më 5 tetor 2007 ndodhi një konflikt i ashpër mes dy familjesh. Situata precipitoi pasi një vajzë nga familja Jusufi ishte larguar dhe ishte strehuar tek familja Sherifi.

Mes palëve ndodhi një përplasje afër varrezave të zonës. Atje u vra 32 vjeçari Zija Jusufi.

Krimi vijoi dhe në një banesë ku u kryen dy vrasje të tjera.

Më herët për këtë krim të trefishtë ishin dënuar me burgim të përjetshëm Mit’hat Sherifi dhe djali i tij Sabri Sherifi.

Për të njëjtën ngjarje u dënua me 10 vjet burg Fatmir Sherifi.

Në kërkim u shpall Besim Sherifi sot 52 vjeç, që shikoni në foto.

Si iu zbulua i kërkuari dhe çfarë tha kur u rrethua nga policia

Besim Sherifi kishte kohë që jetonte në Tiranë. Ai kishte marrë një apartament te zona e Liqenit të Thatë dhe prej kohësh ishte i lirë jashtë vëmendjes policore.

Në rrugë operative, policia mësoi fundvitin e kaluar se një person në kërkim jetonte në arrati te zona e Liqenit të Thatë dhe e vunë nën vëzhgim.

U deshën disa javë që të bëhej verifikimi i tij dhe të ndërmerrej aksioni i sotëm.

Kur një grup policor shkoi tek apartamenti ku jetonte, Besimi mohoi të ishte ai që e thirrën. "Nuk jam unë personi që kërkoni. Nuk kam bërë asnjë vrasje. As që jam nga Maqedonia. Jam shtetas i Kosovës", tha i kërkuari duke paraqitur kartë identiteti false.

Por policia duket se ishte e përgatitur. Atij iu morën gjurmët e gishtërinjve dhe u krahasuan me ato të sjella nga policia maqedonase.

Pasi iu hodhën prangat, mbi të u ngrit dhe akuza e falsifikimit të dokumenteve.

18 vjet i shpëtoi ndjekjes policore, “Liqeni i Thatë” “tradhton” burrin që kërkohej për 3 vrasje