Irani deklaron vazhdimin e programit bërthamor pas sulmeve të SHBA-së

Teheran, 22 qershor – Pas sulmeve ajrore të forcave amerikane ndaj tre qendrave bërthamore iraniane në Fordo, Natanz dhe Isfahan, Organizata e Energjisë Atomike e Iranit deklaroi se programi bërthamor i vendit do të vazhdojë.

Në një deklaratë zyrtare, kjo organizatë theksoi se "pavarësisht sulmeve të fundit dhe sfidave ndërkombëtare, përpjekjet për zhvillimin e industrisë bërthamore do të vijojnë me angazhimin e ekspertëve iranianë." Po ashtu u bë e ditur se janë ndërmarrë masa për të ndjekur çështjen në rrugë ligjore dhe diplomatike.

Organizata akuzoi Shtetet e Bashkuara për shkelje të ligjit ndërkombëtar, duke përmendur veçanërisht Traktatin për Mospërhapjen e Armëve Bërthamore (NPT) dhe marrëveshjet për mbikëqyrje ndërkombëtare nga Agjencia Ndërkombëtare për Energjinë Atomike (IAEA). Sipas saj, objektet e goditura ndodheshin nën mbikëqyrje të rregullt ndërkombëtare dhe kishin karakter civil.

Zyrtarët iranianë i bënë thirrje bashkësisë ndërkombëtare që të dënojë sulmin dhe të mbështesë të drejtat e vendit për zhvillim të teknologjisë bërthamore për qëllime paqësore.

Ndërkohë, Shtetet e Bashkuara konfirmuan sulmet, të cilat, sipas Presidentit Trump, kishin për qëllim “çmontimin e kapaciteteve të pasurimit bërthamor të Iranit”. Ai i quajti këto operacione si një masë parandaluese kundër përhapjes së teknologjisë që mund të çonte drejt ndërtimit të armëve bërthamore.

Agjencia Ndërkombëtare për Energjinë Atomike (IAEA) nuk raportoi ndonjë rritje të niveleve të rrezatimit jashtë objekteve të goditura. /noa.al