Tiranë- AKU ka bllokuar një produkt pule të importuar nga Brazili, pas gjetjes së Salmonella Typhimurium në një mostër të analizuar më 21 mars 2025. Subjekti importues është inspektuar dhe i është referuar Prokurorisë së Rrethit Gjyqësor Tiranë për shkelje të gjurmueshmërisë dhe dhënie informacioni të pasaktë. Autoriteti Kombëtar i Ushqimit siguron qytetarët se situata është nën monitorim të vazhdueshëm dhe çdo veprim është ndërmarrë për mbrojtjen e shëndetit publik.

AKU: Referuar analizimit në ISUV në datën 21.03.2025, për prani të Salmonella Typhimurium në një mostër produkt pule (fileto e ngrirë), e importuar nga Brazili, AKU ka ndërhyrë në mënyrë të koordinuar me strukturat përgjegjëse për gjurmimin, verifikimin dhe bllokimin e produktit në fjalë, si dhe për marrjen e masave administrative dhe ligjore ndaj subjektit përgjegjës.

Është inspektuar subjekti importues për ndjekjen e gjurmueshmërisë, i cili është referuar në organet e Prokurorisë së Rrethit Gjyqësor Tiranë, për veprime të mëtejshme proceduriale, për sa i takon elementëve të veprës penale për mosrespektim të kritereve të gjurmueshmërisë dhe dhënie të informacionit të pasaktë.

Autoriteti Kombëtar i Ushqimit siguron publikun se situata është në ndjekje të vazhdueshme dhe se çdo veprim është ndërmarrë në funksion të transparencës, sigurisë dhe mbrojtjes së shëndetit të qytetarëve.