Juventusi po përgatitet për një revolucion në ekip, me ndryshime të rëndësishme që priten në verë, sidomos në repartin ofensiv. Ndërsa e ardhmja e Thiago Mottës në pankinë mbetet e pasigurt, drejtuesit bardhezinj kanë filluar të planifikojnë lëvizjet e merkatos për sezonin e ardhshëm, me synimin për ta rikthyer ekipin në garë për trofe madhorë në Itali dhe Europë.

Reparti që pritet të pësojë ndryshimet më të mëdha është sulmi. Juventusi përballet me disa largime të mundshme:

Arkadiusz Milik ka vuajtur vazhdimisht nga dëmtimet dhe nuk e ka arritur formën optimale.

Dusan Vlahovic mbetet një emër i përfolur për shitje, veçanërisht për shkak të vlerës së tij të lartë në treg.

Randal Kolo Muani, i huazuar nga PSG, pritet të rikthehet në Francë pas përfundimit të huazimit.

Gatti si kartë për Osimhen – Në këtë kontekst, Juventusi po synon të afrojë Victor Osimhen, sulmuesin e Napolit që aktualisht luan në huazim te Galatasaray. Megjithatë, bisedimet me presidentin e Napolit, Aurelio De Laurentiis, nuk do të jenë të lehta.

Sipas “Tuttosport”, një element që mund ta ndihmojë Juventusin në këtë marrëveshje është Federico Gatti, mbrojtësi bardhezi që pëlqehet shumë nga Antonio Conte, trajneri aktual i Napolit.

Gatti mund të përfshihet si pjesë e shkëmbimit për të ulur çmimin e Osimhenit, duke bërë që operacioni të bëhet më i përballueshëm për Juventusin. Me sulmuesin nigerian në qendër të planeve për rikonstruksionin e sulmit, mbetet për t’u parë nëse bardhezinjtë do të arrijnë ta bindin Napolin për një marrëveshje të favorshme.