Operacioni Forca e Ligjit, e ngritur në kuadër të nismës “anti-KÇK”, iu ka dorëzuar formularët për deklarimin e pasurisë tre personave të dyshuar.
Në një dalje për mediat ditën e sotme, një përfaqësuese e OFL, me syzet vendosur, tha se në kuadër të operacionit Forca e Ligjit, në vijim të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, tre personave të dyshuar.
Formulari i është dorëzuar biznesmenit Dashamir Gjokës, me banim në Durrës, pasi rezulton i dënuar në Itali për veprën penale “Trafik i qenieve njerëzore”.
Kujtojmë se biznesmenit Gjoka iu bë atentat me armë zjarri në vitin 2017 teksa udhëtonte me makinën e tij, ndërkohë që shpëoi pa lëndime.
Sakaq ai rezulton pronari i kompleksit “Gjoka” në Shijak.
Gjithashtu i është dorëzuar edhe Emiljano Hysenaj, me banim në Durrës, pasi rezulton i dënuar në Gjermani për trafikim narkotikësh dhe pastrim parash dhe Edlir Hysenaj, banues në Durrës, me lidhje familjare me Emiljano Hysenaj, pasi dyshohet se gëzon pasuri të prejardhura nga krimi.
Këta individë, si subjekt i Ligjit Special, duhet t’u përgjigjen me shkrim të gjitha pyetjeve të OFL-së dhe përgjigjet e marra do t’i dërgohen SPAK-ut, i cili do të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre.
Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit, në jo më shumë se 6 muaj Gjykata Speciale duhet të vendosë për konfiskimin përfundimtar të tyre.
Me marrjen e masës së sekuestros, çdo pronë e subjekteve do të administrohet nga agjencia e posaçme e Ministrisë së Brendshme. Vetëm banesa mund të vazhdojë të përdoret për strehim, por nuk mund të shitet apo të jepet me qira nga subjekti.
Të gjitha subjektet e Ligjit Special, pra të gjithë të dënuarit apo të akuzuarit gjatë 30 viteve të fundit, për krimet e parashikuara në këtë ligj, do të kalojnë sitën e provës së ligjshmërisë së pasurisë së tyre.
“Asnjë përjashtim nuk do të ketë dhe nuk mund të ketë dhe çdo përpjekje për të tjetërsuar ndërkohë pronën, duke përdorur familjarë apo të njohur, do të rëndojë të dyja palët. Kujtojmë se Ligji Special parashikon vlerësime dhe hetime specifike të pasurisë edhe për rrethin familjar të personave të dënuar apo akuzuar për krim të organizuar e krime të rënda”, deklaroi përfaqësuesja e OFL. /a.y/noa.al
Zbardhet atentati ndaj biznesmenit Dashamir Gjoka, dy persona në kërkim
I shpëtoi atentatit, flet i “forti i Shijakut”, Dash Gjoka tregon si ndodhi ngjarja