Partia Demokratike përshendet fillimin e punës së Prokurorisë së Posaçme, SPAK dhe mbështet funksionimin e pavarur të kësaj strukture.

Ndërsa prokurorët pjesë e SPAK u betuan paraditen e sotme te Presidenti, PD thotë se fillimi menjëherë nga puna dhe ndëshkimi i krimit të organizuar dhe korrupsionit duhet të bëhet në mënyrë profesionale, të paanshme dhe të vendosur.

“Partia Demokratike, e cila ka miratuar ligjin për ngritjen e SPAK dhe të Byrosë Kombëtare të Hetimit, ka vullnetin për t’i dhënë besim dhe për të mos paragjykuar asnjë prej prokurorëve në përbërje të kësaj strukture, pavarësisht vendimeve të disa prej tyre, në të shkuarën. Është koha që prokurorët të ngrihen në lartësinë e detyrës dhe të përmbushin pritshmërinë e qytetarëve shqiptarë për t’i dhënë fund pandëshkueshmërisë së krimit të organizuar, promovuesve të kriminelëve në politikë dhe zyrtarëve të korruptuar”, thuhet në deklaratë.

Më tej nënvizohet se Shqipëria ka një shans të ri dhe real për të luftuar krimin e organizuar dhe korrupsionin në nivelet më të larta, nga kriminelët me mbështetje qeveritare, tek politikanët dhe zyrtarët e lartë.

Partia Demokratike falenderon Shtetet e Bashkuara të Amerikës për ndihmën e dhënë deri më tani për bërjen funksionale të SPAK dhe për gatishmërinë e treguar për të vijuar mbështetjen për funksionimin e pavarur të SPAK. /a.y/noa.al

Nis nga puna Prokuroria e Posaçme, anëtarët e SPAK betohen te Meta

Krijimi i SPAK, ambasada e SHBA: Prokurorë që do vënë para drejtësisë “të paprekshmit”