Deputeti demokrat Edi Paloka, duket se nuk është mjaftuar me mohimin e ministrit të Jashtëm Ditmir Bushati, i cili hodhi poshtë çdo pretendim se ka lidhje me grupin “Bajri”.
Por Paloka ka shkuar më tej, duke i drejtuar disa pyetje Bushatit, teksa thotë, “Me që ministri i Ramës vendosi të “flasë” dhe po tund flamurin e fitores kundër krimit në Shkodër, pse nuk i përgjigjet disa pyetjeve të tjera”.
Ai e pyet se sa herë është takuar me “Bajrot”; Sa herë i ka përdorur për të kërcënuar përfaqësues dhe votues të opozitës dhe sa vota ju ka kërkuar në zgjedhje që ti bëjnë me “mënyrën e tyre”?
Paloka e mbyll qëndrimin e tij duke kërkuar të dijë, “Sa herë ju ka çuar “selam” në emër të Ramës dhe çfarë date mban komunikimi i fundit i tij me Bajrot?”
Më herët ministri i Jashtëm, Ditmir Bushati hodhi poshtë akuzat e opozitës ndaj tij ku deputeti Edi Paloka, e cilësoi si të lidhur me grupin kriminal “Bajri”, gjatë të cilit u arrestuan 11 persona dhe dy të tjerë u shpallën në kërkim.
“Sot është një ditë e mirë për Shkodrën falë vendosmërisë sonë në luftën me krimin. Gjuhët e përdala të atyre që krimin e duan për politikë dhe politikën e bëjnë për të kriminalizuar kundërshtarin, konfirmojnë suksesin e sotëm”, shkruan Bushati.
Gjithçka pasi Edi Paloka, hodhi pretendimin se pjesë e përgjimeve është edhe ministri i Jashtëm, Ditmir Bushati.
“Paska dalë Drejtori i Policisë, i emëruari i Agron Xhafajt, për të deklaruar suksesin e policisë ne arrestimin e Bajrajve. “Kemi 6 muaj që i përgjojmë”, thuhet në deklaratë.
Një pyetje kam për ata që paskan përgjuar; a ju ka dalë në ndonjë përgjim Ditmir Bushati, apo dhe atë e keni fshehur si keni bere me përgjimet e tjera…”, deklaroi Paloka.
Super-operacioni i koduar “Oaz”, u zhvillua në Shkodër, Tiranë dhe Roterdam të Holandës, si pjesë e aksionit “Forca e Ligjit”, pas hetimeve disa mujore.
Të arrestuarit janë Behar Brajoviq (Bajri) arrestuar në Roterdam, Holandë; Samet Halluni, i arrestuar në Roterdam, Holandë; Ilir Rustemi, i arrestuar në ndërhyrjen e datës 6 shtator në Shkodër; Emrah Plaku, i arrestuar në ndërhyrjen e datës 6 shtator në Shkodër; Astmer Bilali, i arrestuar në ndërhyrjen e datës 6 shtator në Shkodër; Armir Grimaj, arrestuar në Shkodër; Safet Rustemi (Bajri), i arrestuar në Tiranë; Fabiol Rexhepi, i arrestuar në Shkodër; Ismet Idrizi, i arrestuar në Shkodër; Denis Brajoviq, i arrestuar në Tiranë dhe Klaudio Hoxhalliu, i arrestuar në Tiranë.
Ndërsa në kërkim u shpallën dy anëtarë të këtij grupi kriminal, për të cilët Gjykata ka dhënë masën e sigurisë “Arrest me burg”, E.Bajri, 45 vjeç, dhe N.H., 34 vjeç.
Akuzat ndaj anëtarëve të këtij grupi kriminal janë: “Vrasje me dashje e mbetur në tentativë”, në bashkëpunim, “Vrasje me dashje”, e kryer në bashkëpunim, “Prodhim dhe mbajtje pa leje të armëve dhe municioneve luftarake”, “Organizim i lotarive të palejuara”, “Pastrim i produkteve të veprës penale” të kryer në bashkëpunim, “Shtrëngim me anë të kanosjes ose dhunës për dhënie të pasurisë”, kryer në bashkëpunim, “Përkrahje e autorit të krimit”, “Moskallëzim krimi”, “Prodhim e shitje e lëndëve narkotike”, vepra penale këto të kryer në kuadër të grupit të strukturuar kriminal. /a.y/noa.al
Shkatërrimi i grupit “Bajri”, Paloka: A ju doli në përgjime emri i ministrit Bushati Shkatërrimi i bandës “Bajri”, mes të arrestuarve trajneri i njohur dhe kandidati për deputet
Si u kapën 11 anëtarët e grupit kriminal “Bajri”, pamjet e arrestimit