Transmetuar më 20-11-2026, 20:48

Kryetari i Partisë Demokratike, Sali Berisha, u ka bërë thirrje të gjitha forcave politike opozitare dhe qytetarëve që të bashkohen në një front të gjerë kundër qeverisë.

Gjatë fjalës së mbajtur në Foltoren e Ripërtëritjes në Tiranë, Berisha deklaroi se bashkimi është arma më e fuqishme e opozitës dhe se ky është momenti për të intensifikuar përballjen politike përmes protestave dhe mobilizimit qytetar.

“Edi Rama është buzë varrit dhe ne duhet t’i japim shtytjen e fundit në banesën e turpit të historisë. Dhe kjo kërkon të bashkohemi”, u shpreh Berisha, duke theksuar se fronti opozitar nuk duhet të kufizohet vetëm te aleancat tradicionale politike.

Kreu i PD-së ftoi edhe forcat politike që kanë programe dhe qëndrime kundër Partisë Demokratike, por që, sipas tij, e konsiderojnë qeverisjen aktuale si rrezikun kryesor për vendin.

“Unë ftoj sot këtu të gjitha forcat politike, edhe ato që në program janë anti-Parti Demokratike. Mbaje programin si të duash, nuk kërkoj ndryshimin, por ama nuk mund të mohosh se rreziku madhor i kombit, rreziku ekzistencial i kombit është partia e krimit dhe Edi Rama”, deklaroi ai.

“Ajo protestë nuk ishte e jona, ishte e qytetarëve dhe ne, si demokratë, e respektojmë atë plotësisht. Në atë protestë protestonin së bashku qytetarë demokratë, qytetarë socialistë, qytetarë pa parti, qytetarë të partive të tjera”, tha Berisha.

“Protestat e tetorit të studentëve dëshmuan se cilët janë kufijtë e trimërisë së shqiptarëve dhe studentëve shqiptarë. Ato dëshmuan se studentët e rinj shqiptarë janë të gatshëm, janë të gatshëm ta asgjësojnë, ta bëjnë të paqenë këtë të keqe të madhe”, u shpreh kreu i demokratëve.

Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Bashkohu me kanalin e NOA WhatsApp për lajmet më të fundit direkt në celularin tënd

Lajmet e fundit