

Tiranë, 19 nëntor 2026 – Ministria e Shëndetësisë ka hedhur për konsultim publik projektligjin e ri mbi kufizimet e përdorimit dhe tregtimit të produkteve të duhanit, një nismë që vjen dy dekada pas miratimit të legjislacionit aktual dhe që synon të frenojë me masa të rrepta aksesin e fëmijëve dhe të rinjve si te cigaret tradicionale, ashtu edhe te produktet e gjeneratës së re. Akti i ri ligjor zgjeron ndjeshëm fushën e veprimit, duke përfshirë nën rregullim të posaçëm cigaret elektronike, enët rimbushëse, produktet bimore për tymosje, qeskat me nikotinë, produktet njëpërdorimëshe për avullim, si dhe çdo pajisje tjetër që emeton tym apo aerosol, pavarësisht nëse prodhohet në vend apo importohet.
Një nga risitë më të rëndësishme të draftit lidhet me disiplinimin e kanaleve të shitjes, duke vendosur ndalimin kategorik të tregtimit të këtyre produkteve përmes platformave online dhe shërbimit postar. Sipas relacionit shoqërues, mungesa e një sistemi të besueshëm për verifikimin e moshës gjatë porositjes dhe dorëzimit krijon një shteg të hapur që këto produkte të bien në duart e të miturve. Për të njëjtën arsye, ndalohet shitja përmes makinave automatike, pikave të vetëshërbimit dhe shitësve ambulantë, ndërkohë që në dyqanet fizike mosha minimale mbetet 18 vjeç dhe shitësit pajisen me të drejtën dhe detyrimin për të kërkuar dokument identifikimi sa herë kanë dyshime mbi moshën e blerësit, duke refuzuar shitjen në mungesë të tij.
Paralelisht me kufizimet tregtare, projektligji zgjeron ndjeshëm perimetrin e hapësirave publike ku ndalohet konsumi, duke barazuar për herë të parë tymin tradicional me produktet që çlirojnë aerosol. Ndalimi i duhanpirjes dhe avullimit do të shtrihet në këndet e lojërave, ambientet sportive, si dhe në një rreze prej 10 metrash përreth institucioneve arsimore dhe shëndetësore. Po ashtu, parashikohet një bllokadë e plotë ndaj çdo forme reklamimi apo promovimi në median e shkruar, televizion, radio dhe platformat dixhitale, duke përfshirë edhe ndalimin e sponsorizimeve të aktiviteteve nga kompanitë e këtij sektori.
Sa i përket masave ndëshkimore, projektligji ruan shkallëzimin aktual të sanksioneve financiare, të cilat variojnë nga 5 mijë deri në 5 milionë lekë në varësi të natyrës dhe rëndesës së shkeljes, të shoqëruara me konfiskimin dhe asgjësimin e mallit. Megjithatë, teksa kuadri ligjor merr formë për t’iu përshtatur realitetit të ri të tregut, sfida kryesore e institucioneve mbetet zbatueshmëria efektive në terren dhe garantimi se këto rregulla nuk do të mbeten vetëm në letër.
Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Bashkohu me kanalin e NOA WhatsApp për lajmet më të fundit direkt në celularin tënd






