

Bruksel, 19 nëntor 2026 – Një operacion i koordinuar ndërkombëtar ka goditur një rrjet të strukturuar të trafikut të kokainës në Anversë të Belgjikës, duke çuar në arrestimin e gjashtë personave të moshës nga 25 deri në 38 vjeç, mes të cilëve bëjnë pjesë edhe shtetas shqiptarë. Aksioni u finalizua ditën e martë pas shtatë kontrolleve të befasishme, katër prej të cilave u zhvilluan në territorin belg, konkretisht në Grimbergen, Jette dhe Ninove, në kuadër të një hetimi të përbashkët mes autoriteteve belge, policisë spanjolle dhe agjencisë europiane Europol.
Gjatë bastisjeve në bazat e grupit, hetuesit sekuestruan 21 pako me kokainë, pajisje të dedikuara për paketimin e lëndëve narkotike, një makinë për numërimin e kartëmonedhave, një sasi kanabisi të gatshëm për treg, pajisje për ngritjen e një plantacioni të brendshëm kultivimi, dokumente identiteti të falsifikuara, si dhe një shumë të konsiderueshme parash. Në vijim të hetimeve, autoritetet arritën të dokumentonin 21 raste të veçanta të transportit të drogës, gjashtë prej të cilave ishin interceptuar dhe shoqëruar me sekuestrime më herët.
Sipas dosjes hetimore, organizata kriminale funksiononte si një urë lidhëse për trafikimin e kokainës nga Belgjika drejt Mbretërisë së Bashkuar, një aktivitet i paligjshëm që u kishte gjeneruar anëtarëve të saj përfitime të vlerësuara në rreth 25 milionë euro. Lënda narkotike hynte përmes portit strategjik të Anversës dhe më pas magazinohej për afate të shkurtra në apartamente me qira në qytet dhe në zonat përreth, të cilat rezervoheshin përmes platformave online për të humbur gjurmët. Pasi ripaketohej në këto ambiente dhe fshihej në çanta sportive, kokaina ngarkohej në kamionë me destinacion Britaninë e Madhe, ndërsa hetimet kanë zbuluar edhe degëzime të rëndësishme në Spanjë, ku dyshohet se strehohen dhe operojnë një pjesë e drejtuesve të këtij rrjeti kriminal.
Shënim: Çdo person që mund të përmendet në përmbajtjen e këtij artikulli, mbështetur mbi parimin procedural penal dhe atë universal të prezumimit të pafajësisë, konsiderohet i pafajshëm penalisht, nëse nuk ka ose deri kur të ketë një vendim të formës së prerë.
Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Bashkohu me kanalin e NOA WhatsApp për lajmet më të fundit direkt në celularin tënd






