

PRISHTINË — Një shtetas i Kosovës, i kërkuar nga drejtësia amerikane për vepra penale që lidhen me krimet kibernetike, është ekstraduar më 19 nëntor drejt Shteteve të Bashkuara të Amerikës. Policia e Kosovës njoftoi se operacioni u realizua nga Drejtoria për Bashkëpunim Ndërkombëtar Policor, në koordinim me njësitë përkatëse dhe institucionet e drejtësisë.
I dyshuari kërkohej në bazë të një urdhërarresti ndërkombëtar, ndërsa dorëzimi i tij te autoritetet amerikane u krye në Aeroportin Ndërkombëtar “Adem Jashari”. Shtetasi kosovar iu dorëzua përfaqësuesve të njësisë amerikane U.S. Marshals, e cila ishte përgjegjëse për marrjen në dorëzim dhe transferimin e tij drejt SHBA-së.
Deri më tani, autoritetet nuk kanë bërë publik identitetin e të dyshuarit apo detaje të mëtejshme mbi aktivitetin e dyshuar kriminal. Policia e Kosovës theksoi se do të vijojë bashkëpunimin me institucionet vendore dhe ndërkombëtare për parandalimin dhe luftimin e krimit, si dhe për kapjen e personave të kërkuar nga drejtësia.
Shënim: Çdo person që mund të përmendet në përmbajtjen e këtij artikulli, mbështetur mbi parimin procedural penal dhe atë universal të prezumimit të pafajësisë, konsiderohet i pafajshëm penalisht, nëse nuk ka ose deri kur të ketë një vendim të formës së prerë.
Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Bashkohu me kanalin e NOA WhatsApp për lajmet më të fundit direkt në celularin tënd






