Transmetuar më 19-11-2026, 08:31

Ministrja e Ekonomisë dhe Inovacionit, Delina Ibrahimaj, ka prezantuar në Kuvend masat kryesore të Projektbuxhetit 2027, duke u ndalur te rritja e pensioneve, lehtësimi i tatimit mbi pagat, ulja e TVSH-së për produktet ushqimore bazë dhe mbështetja për strehimin, punësimin dhe biznesin.

Një nga ndryshimet kryesore të Paketës Fiskale është propozimi për uljen e TVSH-së nga 20% në 6% për 54 produkte të shportës ushqimore. Në të njëjtën kohë, qeveria propozon rritjen e normës standarde të TVSH-së nga 20% në 21% për konsumin e përgjithshëm.

Gjatë fjalës së saj në Parlament, Ibrahimaj deklaroi se Projektbuxheti synon që rritja ekonomike të përkthehet në përfitime konkrete për qytetarët, përmes të ardhurave më të larta, kostove më të ulëta të jetesës dhe mundësive të reja për zhvillim.

42 miliardë lekë për Ministrinë e Ekonomisë dhe Inovacionit

Sipas ministres, ekonomia shqiptare ka ruajtur gjatë viteve të fundit një ritëm rritjeje nga 3,5% në 4%, duke krijuar mundësi për hartimin e politikave fiskale që synojnë rishpërndarjen e të ardhurave dhe mbështetjen e familjeve.

Për vitin 2027, buxheti i Ministrisë së Ekonomisë dhe Inovacionit parashikohet të jetë rreth 42 miliardë lekë, ku pjesa më e madhe shkon për financimin e diferencës së skemave të sigurimeve shoqërore.

Konkretisht, 28,13 miliardë lekë parashikohen për financimin e diferencës së skemave të sigurimeve shoqërore, 5,07 miliardë lekë për arsimin e mesëm profesional, 3,8 miliardë lekë për programet e tregut të punës dhe 1,2 miliardë lekë për strehimin.

Buxheti financon gjithashtu politikat e zhvillimit ekonomik, inovacionin, mbikëqyrjen dhe inspektimin e tregut, mbrojtjen e konsumatorit dhe administrimin e ministrisë.

Në Programin Buxhetor Afatmesëm 2027–2029 parashikohet që në vitin 2029 financimi për sigurimet shoqërore të arrijë 30,4 miliardë lekë, për tregun e punës 3,9 miliardë lekë, ndërsa për strehimin të ruhet në nivelin 1,25 miliardë lekë.

Ibrahimaj tha se projektbuxheti përfshin edhe financimin e nismave të nevojshme për përmbushjen e detyrimeve të Shqipërisë në kuadër të procesit të integrimit evropian.

Dyfishohen shtesat mujore të pensioneve, 24 miliardë lekë për pensionistët

Një nga masat kryesore të prezantuara nga ministrja është dyfishimi i shtesave mujore për pensionistët, politikë që nisi të zbatohej gjatë vitit 2026 me vlera të diferencuara sipas kategorive të pensioneve.

Nga janari i vitit 2027, shtesa mujore për pensionistët urbanë me vite të plota pune parashikohet të rritet nga 1.800 në 3.600 lekë. Për pensionet urbane të pjesshme, shtesa kalon nga 800 në 1.600 lekë, ndërsa për pensionet rurale nga 1.000 në 2.000 lekë.

Për pensionet familjare, shtesa mujore rritet nga 700 në 1.400 lekë, ndërsa për pensionet e invaliditetit të punës nga 600 në 1.200 lekë.

Si shembull, Ibrahimaj përmendi një pensionist me pension urban të plotë, i cili gjatë vitit 2026 merrte 1.800 lekë shtesë në muaj dhe nga janari 2027 parashikohet të marrë 3.600 lekë në muaj. Kjo përkthehet në 43.200 lekë shtesë gjatë një viti.

Për këtë politikë janë parashikuar 20 miliardë lekë në projektbuxhetin e vitit 2027, krahasuar me 10,4 miliardë lekë të planifikuara në vitin 2026.

Veç kësaj, janë parashikuar edhe 4 miliardë lekë për indeksimin e pensioneve, zbatimi i të cilit planifikohet të nisë në muajin prill, me qëllim mbrojtjen e fuqisë blerëse përballë rritjes së çmimeve.

Në total, fondi për indeksimin dhe shtesat mujore arrin në 24 miliardë lekë.

Ministrja rikujtoi edhe objektivin e qeverisë që deri në vitin 2030 asnjë pensionist urban me vite të plota pune të mos ketë pension më të ulët se 40.000 lekë në muaj.

Tatimi mbi pagat, 32.200 punonjës pritet të përfitojnë

Në prezantimin e saj, Ibrahimaj u ndal edhe te politikat për rritjen e pagave dhe lehtësimin e tatimit mbi të ardhurat nga puna.

Ajo kujtoi se gjatë vitit 2026 paga minimale u rrit në 50.000 lekë, masë që sipas vlerësimeve të paraqitura ka ndikuar te 308.000 të punësuar në sektorin publik dhe privat. Gjatë vitit 2026, sipas ministres, u indeksuan edhe pagat në sektorin publik.

Për vitin 2027 propozohet një ndryshim në tatimin mbi të ardhurat nga punësimi. Pragu i pagës mbi të cilin aplikohet norma tatimore 23% parashikohet të rritet nga 200.000 në 300.000 lekë në muaj.

Kjo do të thotë se pjesa e pagës që aktualisht tatohet me 23%, brenda këtij intervali do të tatohet me normën 13%.

Si shembull konkret, ministrja përmendi një punonjës me pagë bruto 250.000 lekë në muaj, i cili sipas ndryshimit të propozuar do të paguajë rreth 5.000 lekë më pak tatim çdo muaj.

Nga kjo masë pritet të përfitojnë rreth 32.200 të punësuar.

TVSH nga 20% në 6% për 54 ushqime bazë, por norma standarde rritet në 21%

Një nga ndërhyrjet më të rëndësishme të Paketës Fiskale të vitit 2027 lidhet me tatimin mbi vlerën e shtuar për produktet ushqimore.

Sipas Ibrahimajt, propozohet ulja e TVSH-së nga 20% në 6% për 54 produkte të shportës ushqimore, të përdorura çdo ditë nga familjet shqiptare.

Në këtë kategori përfshihen mishi, peshku, qumështi, kosi, vezët, mielli, orizi, makaronat, frutat, perimet dhe ushqimet bazë për fëmijët.

Ministrja tha se shpenzimet për ushqimet zënë një pjesë të konsiderueshme të buxhetit familjar, veçanërisht për familjet me të ardhura të ulëta, pensionistët dhe familjet me disa fëmijë.

Sipas përllogaritjeve të prezantuara, shteti parashikon të heqë dorë nga 12,8 miliardë lekë të ardhura tatimore në vit për shkak të uljes së TVSH-së për këto produkte.

Ibrahimaj deklaroi se kjo shumë duhet të përkthehet në më shumë para të disponueshme për familjet shqiptare, përmes reduktimit të çmimeve të produkteve përkatëse.

Për të monitoruar efektin e masës, ministrja njoftoi përdorimin e platformës “Pasqyra e çmimeve”, e cila do të shërbejë për ndjekjen e çmimeve të produkteve ushqimore.

Ndërkohë, qeveria po përgatit edhe një nismë ligjore për t’u dhënë më shumë kompetenca institucioneve publike, me synim garantimin që lehtësimi fiskal të reflektohet në uljen e çmimeve për konsumatorët.

Megjithatë, krahas reduktimit të TVSH-së për 54 produktet ushqimore, Paketa Fiskale përfshin edhe rritjen e normës standarde të TVSH-së nga 20% në 21% për konsumin e përgjithshëm.

Ibrahimaj pretendoi se ndikimi i kësaj rritjeje në buxhetet familjare do të jetë më i ulët sesa përfitimi i pritshëm nga reduktimi i TVSH-së për ushqimet bazë.

Strehimi, 10 mijë zgjidhje banimi përmes subvencionimit të kredive dhe qirave

Një tjetër prioritet i prezantuar nga ministrja është mbështetja për strehimin, veçanërisht për çiftet e reja, të rinjtë dhe studentët e masterit.

Ibrahimaj deklaroi se përmes projektbuxhetit dhe ndryshimeve në ligjin për strehimin synohet të sigurohen 10 mijë zgjidhje strehimi, të cilat ajo i përshkroi si “10 mijë çelësa në dorë”.

Mbështetja do të realizohet përmes subvencionimit të interesave të kredive, subvencionimit të qirave dhe programeve të tjera të strehimit që janë zbatuar që prej vitit 2018.

Sipas ministres, qëllimi është lehtësimi i kostos së strehimit për qytetarët dhe krijimi i më shumë mundësive për familjet dhe kategoritë që kanë nevojë për mbështetje.

Punësimi, garancia rinore dhe financimi i sipërmarrjeve

Projektbuxheti 2027 parashikon gjithashtu zgjerimin e programeve të punësimit dhe mbështetjen e të rinjve që përfundojnë universitetin apo arsimin profesional.

Sipas Ibrahimajt, një nga instrumentet kryesore janë programet e nxitjes së punësimit, të cilat synojnë të ndihmojnë të rinjtë të hyjnë në tregun e punës.

Ministrja njoftoi zgjerimin e garancisë rinore në të gjithë vendin, krahas financimit të programeve për inovacionin dhe zhvillimin e sipërmarrjes.

Gjithashtu, parashikohet mbështetje për bizneset përmes fondeve të dedikuara dhe garancisë sovrane, e cila synon të ndihmojë sipërmarrjet që dëshirojnë të zgjerojnë aktivitetin dhe kapacitetet e tyre.

Ligji “Made in Albania” dhe një nismë e re për industrinë vendase

Në përfundim të fjalës së saj, ministrja iu përgjigj edhe shqetësimeve të ngritura nga deputeti Bozdo për prodhimin industrial dhe perspektivën e industrisë shqiptare.

Ibrahimaj bëri të ditur se Ministria e Ekonomisë dhe Inovacionit ka nisur një proces të posaçëm për mbështetjen e industrisë vendase.

Sipas saj, është përfunduar konsultimi publik për projektligjin “Made in Albania”, i cili synon nxitjen e prodhimit dhe promovimin e produkteve shqiptare.

Paralelisht, ministria po punon së bashku me përfaqësuesit e industrisë për një projektligj tjetër, që lidhet me përshpejtimin industrial.

Ministrja njoftoi se gjatë muajit dhjetor do të zhvillohet një analizë me sektorët industrialë që kanë potencial zhvillimi, jo vetëm në tregun vendas, por edhe përmes përfshirjes në zinxhirët e vlerës së Bashkimit Evropian.

Ajo tha se kjo punë lidhet edhe me bashkëpunimin disavjeçar me agjencitë e BE-së, me fokus sektorët që kanë mundësi më të mëdha për t’u integruar në tregjet evropiane.

Nisma pritet të bëhet publike, të diskutohet në forume dhe me shoqatat e biznesit dhe më pas t’i paraqitet Parlamentit për diskutim dhe miratim.

Në mbyllje të prezantimit, Ibrahimaj theksoi se projektbuxheti i vitit 2027 është hartuar me synimin që politikat ekonomike të mos mbeten vetëm shifra, por të përkthehen në përmirësimin e të ardhurave, lehtësimin e shpenzimeve dhe krijimin e mundësive të reja për qytetarët dhe sipërmarrjet shqiptare. /noa.al

Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.

Bashkohu me kanalin e NOA WhatsApp për lajmet më të fundit direkt në celularin tënd

Lajmet e fundit