

TIRANË- IdentiTek ka reaguar lidhur me ndryshimin në pasaportat e reja shqiptare, ku tashmë në vend të kodit “P” është vendosur kodi “PP”. Kompania njofton se ky ndryshim nuk lidhet me ndonjë gabim gjatë printimit të dokumenteve, por vjen si pasojë e përditësimit të standardeve ndërkombëtare për dokumentet e udhëtimit.
Sipasinformacioneve të IdentiTek, bëhet fjalë për zbatimin e kërkesave të Organizatës Ndërkombëtare të Aviacionit Civil (ICAO), e cila në mars të vitit 2024 miratoi ndryshime në standardet teknike për pasaportat dhe dokumentet e tjera të udhëtimit që lexohen nga sistemet automatike.
Në këtë mënyrë pasaportat e zakonshme tashmë identifikohen me kodin “PP”, në vend të shkronjës “P”, ndërsa pasaportat e shërbimit kanë kaluar nga shënimi “PS” në “PO”. Shkronja e parë tregon llojin e dokumentit, ndërsa e dyta përcakton kategorinë përkatëse të pasaportës.
IdentiTek bën me dije se ky format i ri ka nisur të përdoret në Shqipëri që prej dhjetorit 2025, pra përpara afatit të vendosur nga ICAO, i cili ishte 1 janari 2026. Deri tani, sipas kompanisë, janë prodhuar më shumë se 300 mijë pasaporta me kodet e reja identifikuese.
Një tjetër element që përmban reagimi është edhe përfshirja e Shqipërisë në Drejtorinë Publike të Çelësave të ICAO-s (PKD), ku vendi ynë është anëtarësuar në mars të vitit 2025. Përmes këtij sistemi mundësohet kontrolli elektronik i autenticitetit të pasaportave biometrike dhe i të dhënave që ruhen në çipin e tyre, duke rritur sigurinë dhe duke ndihmuar në luftën kundër falsifikimit të dokumenteve.
IdentiTek shpjegon se përdorimi i kodit “PP” është një përshtatje e detyrueshme me normat ndërkombëtare dhe nuk duhet interpretuar si defekt apo gabim në prodhimin e pasaportave shqiptare.
Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Bashkohu me kanalin e NOA WhatsApp për lajmet më të fundit direkt në celularin tënd






