

Malaria është një sëmundje infektive e shkaktuar nga parazitë të gjinisë Plasmodium, të cilët transmetohen te njerëzit përmes pickimit të mushkonjave femra të infektuara të gjinisë Anopheles. Sëmundja është e përhapur kryesisht në zonat tropikale dhe subtropikale, por raste të importuara shfaqen edhe në vende të tjera për shkak të udhëtimeve.
Rruga kryesore e transmetimit është pickimi i mushkonjës së infektuar, ndërsa sëmundja nuk përhapet përmes kontaktit të zakonshëm mes njerëzve, por në raste të rralla mund të transmetohet përmes transfuzionit të gjakut ose gjilpërave të kontaminuara.
Simptomat e malaries zakonisht shfaqen 10-15 ditë pas pickimit dhe përfshijnë:
Temperaturë të lartë dhe ethe
Të dridhura dhe djersitje të shumta
Dhimbje koke, muskujsh dhe lodhje
Të përziera, të vjella dhe diarre
Në rastet e rënda, veçanërisht kur shkaktohet nga paraziti Plasmodium falciparum, malaria mund të sjellë anemi të rëndë, dëmtime organesh dhe komplikacione fatale. Diagnostikimi bëhet përmes analizave të gjakut dhe trajtohet me sukses nëse kapet në kohë.
Historia e malaries në Shqipëri
Malaria ka qenë historikisht e përhapur në Shqipëri, por transmetimi endemik u ndërpre në vitin 1967 falë programeve të kontrollit dhe eliminimit.
Sipas të dhënave të Institutit të Shëndetit Publik (ISHP), të gjitha rastet e regjistruara në dekadat e fundit janë të importuara nga persona që on udhëtuar në vende ku malaria është e përhapur, kryesisht në shtete të Afrikës. Për shkak se malaria nuk transmetohet nga kontakti njerëzor, prasti i një rasti të importuar nuk do të thotë përhapje automatike e sëmundjes në vend, por kërkon monitorim epidemiologjik për të parandaluar çdo rrezik transmetimi lokal.
Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Bashkohu me kanalin e NOA WhatsApp për lajmet më të fundit direkt në celularin tënd






