

Prishtinë / Vukovar, 17 nëntor 2026 – Tridhjetë e pesë vjet pas rrethimit dhe shkatërrimit të Vukovarit, i njohur në histori si "Stalingradi kroat", kujtimi i njërës prej betejave më të përgjakshme të shekullit të kaluar në Europë mbetet i gjallë, duke mbartur në vetvete edhe një dramë të thellë dhe të pazbardhur shqiptare. Në vjeshtën e vitit 1991, qyteti kroat me arkitekturë baroke pranë Danubit u shndërrua në fushëbetejë, ku përballë rreth 30,000 ushtarëve serbë të pajisur me qindra tanke dhe artileri, qëndruan vetëm rreth 1,800 mbrojtës kroatë me armatim të lehtë, mes të cilëve pati edhe luftëtarë e civilë shqiptarë.
Pas tre muajsh rezistence mbinjerëzore dhe hedhjes së mbi 6,5 milionë predhave mbi qytet, Vukovari ra më nëntor të vitit 1991, duke u pasuar nga krime masive, shkatërrime dhe dërgimin e mijëra mbrojtësve në kampet e përqendrimit në Serbi. Për komunitetin shqiptar, ky qytet përfaqëson një histori dhimbjeje të shumëfishtë: nga familjet e vendosura atje që humbën pronat, bizneset, furrat e bukës e deri te jetët e humbur në spitalin e qytetit, ku mbi 200 pacientë të ekzekutuar përfshinin edhe emra shqiptarësh, pa harruar ushtarët e rinj shqiptarë të mbetur peng në radhët e armatës jugosllave, kokat e të cilëve u shitën shpesh nga oficerët serbë.
Në këtë mozaik vuajtjesh, zëri më kumbues mbetet ai i Klaudija Gojanit, sot gazetare në Radion Kroate të Vukovarit. Babai i saj, Jozo Gojani, kishte emigruar në rininë e tij nga Klina e Kosovës dhe, ndonëse kishte mundësinë të largohej me familjen në Gjermani në prag të luftës, zgodhi të qëndronte për të mbrojtur Kroacinë, vendin që siç shprehej ai i kishte dhënë gjithçka. Jozo u mor peng nga forcat serbe gjatë rënies së qytetit dhe u ekzekutua, ndërsa eshtrat e tij nuk janë gjetur ende. Klaudija, e cila ishte vetëm foshnjë atëbotë dhe nuk e njohu kurrë të atin, ruan vetëm një dëshirë të thjeshtë e të dhimbshme për mediat kroate: "Dua t’i ndez një qiri babait dhe t’i them sa më mungon".
Shënim: Në disa lajme, imazhet gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin.
Bashkohu me kanalin e NOA WhatsApp për lajmet më të fundit direkt në celularin tënd






