TIRANË – Prokuroria e Tiranës ka përfunduar hetimet paraprake dhe ka dërguar në gjyq një jurist të Agjencisë Shtetërore të Kadastrës (ASHK), i cili akuzohet për veprën penale të shpërdorimit të detyrës. Sipas organit të akuzës, ai dyshohet se ka fshirë në mënyrë të paligjshme një shënim kufizues nga kartela e një pasurie në zonën e Selitës, në kryeqytet.

Në dokumentet e prokurorisë thuhet se shtetasi me inicialet A.B., jurist pranë Drejtorisë Vendore të ASHK-së Vlorë, është marrë i pandehur pas kallëzimit të bërë nga administratorja e një kompanie ndërtimi. Kallëzuesja pretendoi se juristi kishte hequr shënimin kufizues të një kontrate sipërmarrjeje nga kartela e një pasurie me sipërfaqe 3,250 metra katrorë, e cila ndodhet në zonën kadastrale 3292 në Selitë.

Nga hetimet e kryera rezultoi se pronarët e tokës kishin lidhur më parë një kontratë sipërmarrjeje me shoqërinë për zhvillimin e pronës. Kjo marrëveshje ishte pasqyruar zyrtarisht në regjistrin kadastral përmes një shënimi bllokimi, i cili shërbente për të garantuar mbrojtjen e interesave kontraktore të kompanisë mbi pronën në fjalë.

Praktika për shqyrtimin e kërkesës i ishte caktuar me short elektronik juristit A.B., pas kërkesës së bërë nga vetë pronarët e tokës. Ata kërkonin heqjen e kufizimit me pretendimin se shoqëria nuk kishte kryer punimet për zhvillimin e pronës, duke dorëzuar gjithashtu një njoftim noterial për ndërprerjen e marrëdhënies kontraktore. Pas këtij veprimi, pronarët kishin lidhur një kontratë të re sipërmarrjeje për të njëjtën pasuri me një tjetër subjekt.

Megjithatë, organi i akuzës konstatoi se kontrata fillestare parashikonte një afat trevjeçar për realizimin e ndërtimit, i cili llogaritej nga momenti i marrjes së lejes së ndërtimit dhe jo nga data e nënshkrimit të vetë kontratës. Sipas Prokurorisë, pretendimet e njëanshme të pronarëve për moszhvillim të pronës nuk përbënin provë të mjaftueshme për përfundimin automatik të marrëveshjes, ndaj juristi nuk duhet të kishte proceduar me fshirjen e shënimit kufizues vetëm mbi këtë bazë.

Prokuroria vlerëson se veprimet e zyrtarit kanë cenuar rëndë interesat e ligjshme të shoqërisë së parë kontraktuese dhe kanë krijuar premisa që e njëjta pasuri t’i nënshtrohet një marrëdhënieje të re me një subjekt tjetër. Çështja tashmë ka kaluar për shqyrtim në gjykatë.