Pas shtatë muajsh në arrati, autoritetet australiane kanë arrestuar shtetasin shqiptar Orjol Rukaj, 47 vjeç, i cili ishte arratisur në muajin prill gjatë ceremonisë mortore të vëllait të tij në Melburn.

Arrestimi i 47-vjeçarit, i cili akuzohet për vepra penale në fushën e narkotikëve, u konfirmua nga Policia e Queensland.

Orjol Rukaj mbahej në paraburgim nën akuzat për trafik droge kur kishte fituar një leje të posaçme nga shërbimi korrektues për të marrë pjesë në funeralin e vëllait të tij, të zhvilluar më 25 prill.

Pavarësisht se ishte i prangosur dhe nën mbikëqyrjen e efektivëve të sigurisë, ai arriti të largohej gjatë ceremonisë.

Sipas dëshmitarëve dhe hetimeve paraprake, Rukaj kishte ndihmuar në mbajtjen e arkivolit gjatë daljes nga varrezat dhe më pas kishte përfituar nga prania e rreth 300 personave në turmë për t’i shpëtuar mbikëqyrjes.

Hetuesit dyshojnë se ai u largua nga vendngjarja me një mjet tip Toyota LandCruiser ngjyrë e zezë.

Pas muajsh kërkimesh, Policia e Queensland lokalizoi dhe arrestoi të premten 47-vjeçarin në Bamaga, një zonë e largët pranë gadishullit Cape York, në veri të shtetit.

Pas këtij operacioni, Rukaj është vendosur sërish në qeli nën masa të rrepta sigurie, ndërsa pritet të përballet me akuzat e reja të arratisjes nga paraburgimi, krahas atyre paraprake për drogë.