SINGAPOR – Një mbrëmje për t’u harruar për Brazilin e Carlo Ancelottit. Seleçao pësoi një humbje 3-2 përballë Japonisë në miqësoren e zhvilluar në Singapor, në një ndeshje me përmbysje, polemika dhe dy kartonë të kuq.

Brazili e nisi keq takimin dhe u gjend në disavantazhin e dy golave pas rrjetave të Kubo dhe Nakamura. Reagimi erdhi nga Vinicius Junior, i cili me dy gola të shkëlqyer riktheu baraspeshën dhe dukej se do t’i shpëtonte skuadrës së Ancelottit nga humbja.

Por Japonia nuk ishte dorëzuar. Në minutat e fundit, Sakamoto shënoi golin e fitores 3-2, duke shkaktuar protesta të menjëhershme nga stoli brazilian. Futbollistët dhe pjesëtarët e stafit pretenduan se aksioni që solli golin ishte i parregullt dhe hynë në fushë për të kundërshtuar vendimin e arbitrit.

Situata doli jashtë kontrollit dhe gjyqtari Jansen Foo ndëshkoi me karton të kuq trajnerin Carlo Ancelotti dhe Raphinhën.

Pas ndeshjes, tekniku italian nuk i kurseu kritikat ndaj arbitrit, duke e bërë atë përgjegjës për mënyrën se si u menaxhua takimi.

“Rezultati padyshim u kushtëzua nga arbitri, i cili nuk diti ta gjykonte ndeshjen. Por nuk është as faji i tij. Ishte një ndeshje e nivelit të lartë dhe mendoj se ai nuk kishte eksperiencën e duhur për të arbitruar një sfidë të tillë”, deklaroi Ancelotti.

Sa i përket kartonit të kuq, trajneri shpjegoi se arbitri e ndëshkoi për pamundësinë për të kontrolluar stolin, pasi disa futbollistë kishin hyrë në fushë për të protestuar.

Një humbje e hidhur për Brazilin, që përveç rezultatit negativ, largohet nga Singapori edhe me polemika dhe dy përjashtime.