PRISHTINË – Kombëtarja e Kosovës ka dorëzuar pranë UEFA-s listën zyrtare me 23 futbollistë për ndeshjen e rëndësishme të sotme kundër Izraelit, e cila vlen për xhiron e pestë të Grupit 3 në Ligën B të Ligës së Kombeve. Ballafaqimi do të zhvillohet në stadiumin “Fadil Vokrri” në Prishtinë, me fillim nga ora 15:00.

Për këtë grumbullim, përzgjedhësi Franco Foda kishte ftuar fillimisht 27 lojtarë, duke përfshirë edhe disa prurje të reja. Megjithatë, procesi i përgatitjeve është shoqëruar me disa ndryshime të detyruara në organikë. Gjatë ditëve të para, nga grupi u liruan Valmir Matoshi dhe Erblin Osmani, ndërsa në vend të tyre iu bashkua Betim Fazliji.

Më pas, situata u ndërlikua edhe nga dëmtimet e papritura, të cilat detyruan që grumbullimin ta lënë Lumbardh Dellova dhe Ermal Krasniqi. Këto zhvillime e ngushtuan numrin e lojtarëve në dispozicion të stafit teknik në 24, duke bërë që të merrej vendimi përfundimtar për listën prej 23 futbollistësh. Sulmuesi 18-vjeçar i Stuttgartit, Enis Rexhepi, ka mbetur jashtë listës për këtë përballje.

Pavarësisht mungesave, reparti ofensiv i Kosovës ruan fuqinë e tij me emra të spikatur si Vedat Muriqi, Edon Zhegrova, Fisnik Asllani, Baton Zabërgja dhe Albion Rrahmani. Përfaqësuesja synon fitoren para tifozëve vendas për të siguruar qëndrimin në Ligën B dhe për të mbajtur të hapura synimet për pozitat e larta në grup.