Tiranë, 13 nëntor 2026 – Një darkë e lënë pas dore, qoftë për shkak të angazhimeve të shumta ditore, mungesës së oreksit apo përdorimit të medikamenteve, mund të dëmtojë ndjeshëm cilësinë e gjumit, paralajmërojnë ekspertët e ushqyerjes.

Ndonëse nuk rekomandohet një vakt i rëndë dhe i bollshëm para se të shtriheni, konsumimi i diçkaje të lehtë në mbrëmje është thelbësor. Nutricionistet Gabrielle Kishner dhe Samina Kalloo shpjegojnë se cikli i gjumit dhe zakonet ushqimore lidhen ngushtësisht përmes ritmit cirkadian, orës sonë të brendshme biologjike.

Nëse vaktet e vona dhe të rënda e mbajnë sistemin tretës aktiv, rrisin temperaturën e trupit dhe shkaktojnë luhatje të sheqerit në gjak apo refluks acidi, nga ana tjetër, anashkalimi i plotë i darkës jep efekte të ndryshme tek çdo individ.

“Disa njerëz e kanë të vështirë të bien në gjumë kur shkojnë në shtrat të uritur, ndërsa të tjerë ndihen mirë nëse e konsumojnë vaktin e fundit më herët gjatë ditës. Megjithatë, edhe nëse arrini të flini, uria mund t’ju zgjojë gjatë natës. Për më tepër, kalimi i mbrëmjes pa ngrënë ju lë tepër të uritur në mëngjes, gjë që shpesh çon në ngrënie të tepërt,” thekson Kalloo.

Çfarë duhet të konsumoni dhe çfarë duhet të shmangni në mbrëmje?

Për të garantuar një gjumë të qetë dhe rigjenerues, ekspertët këshillojnë kombinimin e proteinave, karbohidrateve me shumë fibra dhe yndyrave të shëndetshme. Shembuj të përshtatshëm përfshijnë bukën e thekur me grurë të plotë, gjalpë kikiriku dhe një banane, ose një pjatë kos me granola dhe manaferra.

Për më tepër, përfshirja e ushqimeve të pasura me magnez (perime me gjethe jeshile, drithëra plota, arra dhe fara) dhe triptofan (vezë, mish shpendësh, produkte qumështi, tofu) ndihmon në relaksimin e organizmit. Ndihmë të madhe japin edhe vitaminat B12, antioksidantët nga frutat e perimet, si dhe çajrat bimorë qetësues si kamomili.

Në krahun e kundërt, në orët e mbrëmjes duhet të shmangni rreptësisht ushqimet e yndyrshme, sheqernat e shtuara, alkoolin dhe kafeinën. Nëse zgjidhni të konsumoni një vakt më të bollshëm, nutricionistët këshillojnë të prisni të paktën dy deri në tre orë para se të vendosni të flini.