Igumenicë, 13 nëntor 2026 – Policia greke ka vënë në pranga mëngjesin e sotëm në Igumenicë një shtetase shqiptare, e cila u kap në flagrancë duke transportuar një sasi të konsiderueshme lënde narkotike të llojit marijuanë.

Gjatë kontrolleve të ushtruara në terren, efektivët ndaluan automjetin që drejtohej nga gruaja shqiptare, ku pas kontrollit të imtësishëm u zbuluan dhe u sekuestruan 80 pako me marijuanë, me një peshë totale prej 86 kilogramë e 438 gramë.

Sipas hetimeve paraprake të autoriteteve greke, ngarkesa ishte marrë në kufirin e gjelbër me Shqipërinë dhe kishte si destinacion futjen në brendësi të territorit grek. Sasia e drogës dhe automjeti u konfiskuan në cilësinë e provës materiale, ndërsa e arrestuara pritet të dërgohet pranë Prokurorisë së Shkallës së Parë të Thesprotisë për veprime të mëtejshme ligjore.

Sipas të dhënave zyrtare të policisë greke, vetëm gjatë 15 muajve të fundit janë kapur rreth 1.4 ton marijuanë në zonat e Igumenicës, Janinës, Kosturit, Follorinës dhe Selanikut.