Ernest Muçi ishte një nga protagonistët kryesorë në fitoren 2-0 të Shqipërisë ndaj Finlandës, duke realizuar një gol spektakolar që ndezi entuziazmin e tifozëve në “Arenën Kombëtare”.

Sulmuesi kuqezi zhbllokoi rezultatin në minutën e 35-të, me një goditje të bukur që u shndërrua në një nga momentet më të veçanta të ndeshjes. Goli i tij u prit me festë të madhe nga tifozët shqiptarë, por jehona e këtij realizimi shkoi edhe përtej kufijve të Shqipërisë.

Edhe klubi turk Trabzonspor, ku aktivizohet futbollisti shqiptar, ka festuar për paraqitjen e tij me fanellën e Kombëtares. Përmes një postimi në rrjetet sociale, klubi ka përgëzuar Muçin për golin e realizuar dhe fitoren e Shqipërisë.

“Urime futbollistit tonë Ernest Muçi, i cili shënoi golin e parë të Kombëtares së tij në fitoren 2-0 të Shqipërisë ndaj Finlandës në Nations League”, thuhet në mesazhin e klubit turk.

Kështu, realizimi i Muçit nuk ka sjellë vetëm gëzim për tifozët kuqezi, por ka marrë vlerësime edhe në Turqi, ku sulmuesi shqiptar vazhdon të përfaqësojë Trabzonsporin.