Tiranë, 12 nëntor 2026 – Këshilli i Ministrave ka zhvilluar mbledhjen e radhës këtë të enjte, ku ka miratuar një sërë projektligjesh dhe vendimesh të rëndësishme që prekin fusha të tilla si eficienca energjetike, siguria kibernetike, ndihma shtetërore dhe mbrojtja e grave nga dhuna.

Në fokus të vendimmarrjes së qeverisë ka qenë edhe miratimi i lirimit nga detyra të zëvendësministrit të Turizmit, Kulturës dhe Sportit, Endrit Hoxha, i cili më parë ka mbajtur edhe postin e zëvendësministrit të Arsimit.

Gjatë mbledhjes, Qeveria miratoi projektligjin për eficiencën energjetike dhe ndryshimet në ligjin për ndihmën shtetërore e sigurinë kibernetike, si dhe përcaktoi qëndrimet për nismat joqeveritare lidhur me ndarjen administrativo-territoriale dhe shfuqizimin e ndryshimeve në ligjin për zonat e mbrojtura.

Po ashtu, u miratuan vendime për përbërjen dhe funksionimin e grupit negociator për anëtarësimin në Bashkimin Europian dhe ngritjen e mekanizmit të koordinuar për referimin e rasteve të dhunës ndaj grave dhe në familje.