DUBLIN – Kryeministri Edi Rama, gjatë një prononcimi për mediat nga Dublini ku po merr pjesë në punimet e samitit të Komunitetit Politik Europian, ka prekur çështjet kryesore të politikës së jashtme dhe asaj të brendshme, duke iu përgjigjur edhe pikpyetjeve lidhur me projektin e investimit në ishullin e Sazanit.

I pyetur rreth zhvillimeve në Ukrainë dhe qëndrimit ndaj Rusisë, kreu i qeverisë shqiptare u shpreh se shmangia e dialogut diplomatik ka përbërë një mangësi në qasjen ndërkombëtare. Sipas tij, fokusi i ngushtë vetëm te mbështetja ushtarake për Kievin, pa mbajtur hapur një kanal komunikimi me Moskën, përbën një gabim të madh në përpjekjet për zgjidhjen e konfliktit.

Lidhur me debatin e ngritur për investimin e paralajmëruar nga dhëndri i ish-presidentit amerikan Donald Trump, Jared Kushner, në ishullin e Sazanit, Rama refuzoi zërat se prona i është shitur investitorëve të huaj. Ai sqaroi se procesi ndodhet në fazë diskutimesh dhe se shteti shqiptar po shqyrton me kujdes çdo hap ligjor e procedural.

"Nuk ka ishull të shitur. Jemi në tre vite negociata dhe bisedime, kështu që Republika e Shqipërisë është duke parë të gjitha praktikat në atë investim," deklaroi kryeministri.

Gjatë fjalës së tij, Rama rikonfirmoi qartësisht se orientimi strategjik i Shqipërisë mbetet anëtarësimi në Bashkimin Europian, duke theksuar se vendimet për fatet politike dhe të ardhmen evropiane të vendit i përkasin vetëm qytetarëve shqiptarë. Kryeministri u ndal gjithashtu te roli dhe kontributi i Shqipërisë në nismat e bashkimit dhe organizimit të forumeve ndërkombëtare kontinentale.