PRISHTINË – Kuvendi i Kosovës ka miratuar sot mocionin për përfshirjen e Ligjit për Dhomat e Specializuara dhe Zyrën e Prokurorit të Specializuar në rendin e ditës së seancës plenare.

Mocioni on kërkoi shqyrtimin e ligjit mori mbështetjen e 79 deputetëve, ndërkohë që nuk pati asnjë votë kundër apo abstenim. Pas këtij votimi, projektligji u caktua si pika e 11-të e rendit të ditës, ku pritet të kalojë për shqyrtim dhe votim përfundimtar nga ana e ligjvënësve.

Ky zhvillim vjen pas arritjes së një dakordësie politike ndërmjet Partisë Demokratike të Kosovës (PDK) dhe Lëvizjes Vetëvendosje që ligji të procedohet për rimiratim në formën e tij aktuale, pa përfshirë ndërhyrje apo ndryshime shtesë në këtë fazë.

Ligji në fjalë ishte votuar fillimisht nga Kuvendi më 6 tetor, por më pas u kthye për rishqyrtim përmes vetos nga ana e presidentes së vendit. Për kalimin e tij dhe tejkalimin e dekretit presidencial kërkohet një shumicë prej të paktën 61 votash të deputetëve, shifër kjo e cila pritet të arrihet duke u mbështetur te konsensusi i shprehur në votimin e mocionit.