TIRANË – Kryetari i Partisë Demokratike, Sali Berisha, është përfshirë në një përplasje verbale me gazetaren Klodiana Lala, gjatë paraqitjes së tij të sotme në ambientet e Prokurorisë së Posaçme (SPAK). Berisha, i cili u paraqit në cilësinë e kallëzuesit pa dokumente shoqëruese, u pyet nga gazetarët nëse kishte dorëzuar prova të reja lidhur me çështjen e gjyqtares Irena Gjoka.

Pasi gazetarja Lala i drejtoi pyetjen nëse kishte paraqitur dokumente për këtë çështje, kreu i opozitës reagoi ashpër, duke e akuzuar atë se është e keqpërdorur në mënyrë ekstreme nga strukturat e SPAK-ut dhe se vepron si informante e tyre.

Pjesë nga replikat:

Berisha: "Disa gazetarë si Klodiana Lala bëjnë si…. Ti si hiqesh si informante, kush t’i jep të dhënat? Pse nuk merr informacion nga unë. Sepse ti je e keqpërdorur."

Lala: "Zoti Berisha, unë jam gazetare, qëllimi im është për të informuar opinionin publik."

Berisha: "Klodiana Lala është një person i keqpërdorur pa mëshirë."

Kallëzimi penal ndaj gjyqtares Irena Gjoka është dorëzuar nga Sali Berisha dhe dhëndri i tij, Jamarbër Malltezi, të cilët e akuzojnë atë për falsifikim të formularit të vetëdeklarimit sa i përket një dënimi të pretenduar në Greqi. Gjyqtarja Gjoka është figura kyçe që ka firmosur masat e sigurisë dhe kërkesat e SPAK-ut në kuadër të hetimeve për dosjen “Partizani”, çështje në të cilën Berisha dhe Malltezi janë nën hetim.