TIRANË – Administrata Doganore ka bllokuar mbi 2,1 ton produkte ushqimore dhe lodra për fëmijë në Tiranë, pasi gjatë kontrolleve fizike janë konstatuar shkelje dhe parregullsi në etiketimin e tyre.

Sipas njoftimit zyrtar, bëhet fjalë për një ngarkesë prej 156 mijë njësish produktesh ushqimore dhe lodrash të ambalazhuara, të cilave u mungonte informacioni i detyrueshëm ligjor, konkretisht data e jetëgjatësisë minimale ose afati i përdorimit.

Parregullsitë u evidentuan nga Dega Doganore e Tiranës në bashkëpunim me Sektorin e Monitorimit pranë Drejtorisë së Përgjithshme të Doganave, gjatë kontrolleve të ushtruara në bazë të analizës së riskut. Mungesa e këtij informacioni përbën shkelje të drejtpërdrejtë të kërkesave të përcaktuara në vendimin e Këshillit të Ministrave nr. 434, datë 11 korrik 2018, për etiketimin e ushqimeve dhe informimin e konsumatorit.

Për këtë arsye, autoritetet doganore kanë vendosur bllokimin e menjëhershëm të të gjithë ngarkesës, duke mos lejuar çlirimin e mallrave për në treg deri në përfundimin e plotë të verifikimeve dhe procedurave ligjore.

Drejtori i Përgjithshëm i Doganave, Besmir Beja, ka kërkuar angazhimin maksimal të strukturave përgjegjëse për hetimin e rastit dhe ndjekjen e mëtejshme të masave ligjore. Administrata Doganore thekson se kontrollet e rrepta do të vijojnë në mënyrë të vazhdueshme, me qëllim parandalimin e hedhjes në treg të produkteve që nuk përmbushin standardet dhe garantimin e mbrojtjes së shëndetit të konsumatorëve.