ELBASAN – Policia e Shtetit ka vijuar operacionin e koduar “Porosia” për zbardhjen e plotë të ngjarjes së ndodhur një javë më parë në lagjen “28 Nëntori”, ku u regjistrua një shpërthim me tritol në automjetin në pronësi të shtetases A. D. Si rezultat i veprimeve intensive hetimore dhe operacionale, shërbimet e Komisariatit të Policisë Elbasan kanë lokalizuar, kapur dhe ndaluar shtetasin e shpallur në kërkim B. H., 17 vjeç.

Sipas informacioneve zyrtare, i mituri dyshohet si bashkautor i ngjarjes, konkretisht si personi që ka kryer vendosjen e lëndës plasëse në mjet.

Grupi i posaçëm hetimor, nën drejtimin e Prokurorisë, po vijon punën intensive për identifikimin, kapjen dhe vënien para përgjegjësisë ligjore të të gjithë personave të tjerë të përfshirë në këtë ngjarje kriminale, si dhe për zbardhjen e plotë të motiveve të saj.

Materialet procedurale i kaluan Prokurorisë për veprime të mëtejshme, për veprat penale “Shkatërrimi i pronës me eksploziv”, kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe i municionit”.

Njoftimi:

Elbasan/Vijon operacioni i koduar “Porosia”, për nxjerrjen përpara përgjegjësisë penale, të të gjithë shtetasve të përfshirë në shpërthimin me lëndë plasëse, të automjetit të shtetases A. D., një javë më parë.

Lokalizohet dhe kapet njëri prej autorëve, që dyshohet se ka vendosur lëndën plasëse në automjet.

Në vijim të veprimeve hetimore dhe operacionale të kryera nga shërbimet e Komisariatit të Policisë Elbasan, për zbardhjen e autorësisë dhe rrethanave të rastit të datës 05.11.2026, në lagjen “28 Nëntori”, ku u shpërthye me lëndë plasëse automjeti në pronësi të shtetases A. D., u ndalua shtetasi në kërkim, B. H., 17 vjeç.

Ky shtetas dyshohet se është bashkautor në vendosjen dhe shpërthimin e lëndës plasëse.

Vijon puna për identifikimin e të gjithë shtetasve të përfshirë në këtë ngjarje dhe individualizimin e përgjegjësive penale të tyre, nën drejtimin e Prokurorisë.

Materialet procedurale iu referuan Prokurorisë, për veprime të mëtejshme, për veprat penale “Shkatërrimi i pronës me eksploziv”, kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe i municionit”.