TIRANË – Ish-shefi i Forcës Operacionale, Oltion Bistri, nuk është gjetur në banesë nga ana e forcave të rendit, të cilat nuk kanë mundur të ekzekutojnë ende vendimin e formës së prerë të dhënë një ditë më parë nga Gjykata e Posaçme e Apelit për Korrupsionin dhe Krimin e Organizuar. Sipas informacioneve paraprake, Bistri ndodhet prej muajsh jashtë territorit të Republikës së Shqipërisë.

Apeli i Posaçëm e shpalli fajtor ish-drejtuesin e lartë të policisë për dosjen e njohur si "Metamorfoza", duke e dënuar atë fillimisht me 11 vjet heqje lirie. Për shkak të aplikimit të gjykimit të shkurtuar, dënimi u ul në 7 vite e 4 muaj burgim. Megjithatë, sipas përllogaritjeve të kryera nga prokurorët e Prokurorisë së Posaçme (SPAK), duke marrë parasysh kohën e kaluar në qeli gjatë masës së sigurisë, Bistrit i kanë mbetur për të shlyer edhe 3 vjet, 10 muaj e 14 ditë burg.

Në ndryshim nga vendimi i shkallës së parë dhënë në vitin 2025, e cila e kishte dënuar vetëm për akuzën e zbulimit të akteve ose të dhënave sekrete, Gjykata e Apelit e ka fajësuar atë edhe për veprat penale të korrupsionit pasiv dhe të pastrimit të produkteve të veprës penale. Po kështu, vendimi i djeshëm ka rikthyer në fuqi edhe masën e konfiskimit të pasurive të tij, që përfshijnë 3 apartamente, 2 dyqane, si dhe një vlerë monetare prej 1 milion eurosh cash.

Oltion Bistri u vu në pranga fillimisht më 27 korrik 2023 në kuadër të operacionit "Metamorfoza", i cili zbardhi komunikimet e koduara në aplikacionet e fshehta. Ai qëndroi në paraburgim deri më 18 nëntor të vitit të kaluar, kur Gjykata e Posaçme urdhëroi lirimin e tij me pretendimin se koha e dënimit të vuajtur në paraburgim ishte shlyer.

Dosja “Metamorfoza” solli në vëmendje lidhjet e dyshuara mes drejtuesve të lartë të strukturave të rendit dhe botës së krimit, ku ish-kreu i Operacionales akuzohej se informonte biznesmenin e kazinove Pëllumb Gjoka për kontrollet e policisë, duke i siguruar paprekshmërinë e biznesit të tij në Tiranë. Në të njëjtën dosje u përfshi edhe ish-drejtuesi i Prokurorisë së Kukësit, Xhevahir Lita, i dënuar gjithashtu për nxjerrje të të dhënave sekrete dhe korrupsion pasiv.