TIRANË – Presidenti i Republikës, Bajram Begaj, ka dekretuar sot emërimin e Esmeralda Hasanit në krye të Shërbimit Informativ të Shtetit (SHISH), pas propozimit të paraqitur nga kryeministri. Ajo merr drejtimin e institucionit kyç të sigurisë pas shkarkimit të paraardhëses së saj, Vlora Hyseni, e cila ndodhet nën masën e sigurisë "arrest në shtëpi" në kuadër të hetimeve për çështjen e njohur si dosja "AKSHI".

Përpara këtij emërimi, Hasani ka shërbyer si këshilltare në Kryeministri, ndërsa më herët ka qenë pjesë e vetë strukturave të SHISH-it, ku ka drejtuar Departamentin e Mbështetjes.

Profil: Kush është Esmeralda Hasani?

E njohur në qarqet akademike dhe institucionale si një profile me qasje ndërkombëtare, rrugëtimi i saj profesional ndërthur diplomacinë, kërkimin shkencor dhe menaxhimin e projekteve evropiane.

Edukimi dhe Formimi Akademik: Esmeralda Hasani është diplomuar në Drejtësi Ndërkombëtare në Universitetin Shtetëror të Milanos. Më pas, ajo ka përfunduar studimet e larta Master në Planifikimin dhe Zhvillimin e Projekteve në Innovation Business School në Bruksel.

Përvoja Akademike dhe Kërkimore: Veprimtaria e saj është fokusuar gjithashtu në mësimdhënien e të Drejtës Evropiane, duke zotëruar njohuri të thelluara mbi procesin e integrimit të Shqipërisë drejt Bashkimit Evropian. Ajo ka qenë eksperte e pavarur e Komisionit Evropian për Kërkimin dhe Inovacionin.

Drejtimi i Institucioneve dhe Programeve:

Nga shtatori 2015 deri në shtator 2019, ajo ka mbajtur pozicionin e Drejtoreshës Ekzekutive të Institutit Barleti për Kërkim dhe Zhvillim.

Prej shtatorit 2019, ajo drejton Institutin Adriapol – Rritje e Mençur dhe Kreative.

Së fundmi, ajo është përzgjedhur nga Misioni i Organizatës Ndërkombëtare për Migracionin (IOM) në Shqipëri si Konsulente Ndërkombëtare për Zhvillimin e Projekteve.

Kontributi në Diasporë: Gjatë periudhës shtator 2017 – dhjetor 2018, Hasani ka qenë pjesë e kabinetit të Ministrit të Shtetit për Diasporën në cilësinë e këshilltares dhe shefes së kabinetit, duke qenë gjithashtu ideatore dhe autore e projektit strategjik për angazhimin e diasporës në zhvillimin social dhe ekonomik të vendit.

Baza ligjore e emërimit Dekretimi i zonjës Hasani në krye të SHISH-it u bë në mbështetje të neneve 92 (shkronja “f”) dhe 93 të Kushtetutës së Republikës së Shqipërisë, si dhe të nenit 5 të ligjit nr. 8391, datë 28.10.1998, “Për Shërbimin Informativ të Shtetit” (i ndryshuar). Sipas njoftimit zyrtar të Presidencës, përpara dekretit janë përmbushur dhe kaluar me sukses të gjitha procedurat ligjore të verifikimit për funksionet e larta shtetërore.