Zyrih, 11 nëntor 2026 – Ish-presidenti i FIFA-s, Sepp Blatter, ka lëshuar një sulm të ashpër ndaj kreut aktual të organit qeverisës të futbollit botëror, Gianni Infantino, duke e cilësuar si “diktator” dhe duke deklaruar se ai ka nevojë për ndihmë psikiatrike.

Në një intervistë për revistën gjermane “Der Spiegel”, 90-vjeçari zviceran kritikoi rëndë mënyrën e drejtimit të federatës nga bashkatdhetari i tij, duke përfshirë vendimin për krijimin e një çmimi të paqes nga FIFA, i cili iu akordua Presidentit të SHBA-së, Donald Trump, përpara Kupës së Botës së zhvilluar verën e kaluar në SHBA, Kanada dhe Meksikë. Po ashtu, Blatter sulmoi planet e mëparshme të Infantinos për shitjen e një pjese të të drejtave komerciale të turneut, nismë që u tërhoq pas reagimeve të forta.

“FIFA po vuan. Për momentin drejtohet nga një njeri që ka humbur plotësisht kontaktin me realitetin. Ai është një ‘diktator’. Njerëzit brenda FIFA-s më thonë se askush nuk lejohet të hyjë në ashensor me të. Ai është ‘i paprekshëm’. Ndoshta duhet ta dërgojnë Infantinon në një klinikë psikiatrike në një moment të caktuar,” u shpreh Sepp Blatter.

Deklaratat e ish-drejtuesit të futbollit botëror rihapin debatet e ashpra mbi qeverisjen, vendimmarrjen dhe transparencën brenda institucionit më të lartë të futbollit ndërkombëtar.