Buenos Aires, 11 nëntor 2026 – Ish-anëtari 74-vjeçar i organizatës ekstremiste të majtë “Brigadat e Kuqe”, Leonardo Bertulazzi, është arratisur nga arresti shtëpiak ku mbahej në Buenos Aires të Argjentinës.

Drejtoria e Përgjithshme e Inteligjencës Kriminale ka lëshuar menjëherë një urdhër arresti urgjent për kapjen e tij, ndërsa po mbahej në një banesë në qendër të kryeqytetit argjentinas duke pritur ekstradimin përfundimtar drejt Italisë, pas revokimit të statusit të tij të refugjatit nga Gjykata e Lartë e Drejtësisë. Në vendlindje, ai përballet me një dënim prej 27 vjetësh burg për rrëmbim personi, lidhje subversive dhe pjesëmarrje në grup të armatosur.

Arratsisja ka befasuar edhe mbrojtjen e tij ligjore, me avokatin Gabriele Fuga që deklaroi se nuk kishte pasur asnjë kontakt me 74-vjeçarin prej muajsh.

“Bertulazzi, së bashku me Mario Moretti dhe Riccardo Dura, ishte i përfshirë në rrëmbimin e inxhinierit Piero Costa në vitin 1977 në Xhenova. Nga shpërblimi i përfituar, 50 milionë lireta u përdorën nga organizata për blerjen e apartamentit në Via Montalcini në Romë, ku u mbajt i burgosur dhe u vra ish-kryeministri italian Aldo Moro,” citohet nga dosja e tij hetimore.

I arratisur nga drejtësia që nga viti 1980, Bertulazzi u riarrestua në gusht të vitit 2024 pas anulimit të azilit, ndërsa më 1 korrik 2025 Gjykata Supreme e Argjentinës miratoi përfundimisht kërkesën për ekstradimin e tij drejt autoriteteve italiane.