Tiranë, 11 nëntor 2026 – Kryetari i Bashkisë së Tiranës, Erion Veliaj, i është drejtuar zyrtarisht këtë të mërkurë kryetarit të Grupit Parlamentar të Partisë Socialiste, Taulant Balla, me kërkesën për nisjen e procedurave për ngritjen e një komisioni hetimor parlamentar lidhur me transferimin e tij nga burgu i Durrësit në atë të Fierit.

Përmes një reagimi publik, Veliaj bën me dije se kërkesa lidhet me pretendimet e tij për ndërhyrje dhe kërcënime nga kryeministri Edi Rama, nëpërmjet ministrit të Drejtësisë, Toni Gogu. Sipas tij, komisioni duhet të hetojë nëse transferimi në Fier dhe kushtet e paraburgimit janë përdorur si mjete presioni për ta detyruar të marrë përgjegjësinë për organizimin e protestave në Tiranë dhe të japë dorëheqjen nga mandati i kryebashkiakut.

Kryebashkiaku është shprehur i gatshëm të dëshmojë nën betim përpara Kuvendit, të përballet me ministrin Toni Gogu dhe të paraqesë provat që disponon, ndërsa kërkon që në procesin e llogaridhënies të përfshihet edhe kryeministri Edi Rama.

“Mandati i një kryetari bashkie buron nga vota e qytetarëve dhe vota e qytetarëve nuk mund të bëhet objekt shantazhi politik,” deklaroi Veliaj në reagimin e tij zyrtar.

Kreu i Bashkisë së Tiranës bëri të ditur se ka vënë në dijeni edhe Kongresin e Autoriteteve Lokale dhe Rajonale të Këshillit të Evropës, si dhe trupin diplomatik të akredituar në Shqipëri, duke kërkuar njëkohësisht ruajtjen e menjëhershme të provave dokumentare dhe audiovizive që lidhen me procedurën e transferimit të tij.

Kerkesa-e-Veliajt-per-Komision-Hetimor