Tiranë, 11 nëntor 2026 – Bordi i Transparencës së Karburanteve ka fiksuar këtë të mërkurë çmimet e reja tavan të tregtimit të naftës, benzinës dhe gazit me shumicë e pakicë. Vendimi i ri ka sjellë një ulje të ndjeshme për naftën dhe benzinën, ndërsa për herë të parë ka përfshirë edhe caktimin e çmimit tavan për gazin e lëngshëm të naftës (LPG), me qëllim parandalimin e abuzimeve në treg.

Çmimet e reja maksimale për shitjen me pakicë, të cilat kanë hyrë në fuqi që nga ora 14:00 e ditës së sotme, u caktuan në 205 lekë/litër për gazoilin, 164 lekë/litër për benzinën dhe 68 lekë/litër për gazin e lëngshëm. Ndërkohë, për tregtimin me shumicë, çmimet tavan janë caktuar përkatësisht në 193 lekë/litër për naftën, 152 lekë/litër për benzinën dhe 56 lekë/litër për gazin.

“Për herë të parë u vendos që të përcaktohej një kufi tavan për tregtimin e gazit për shkak të abuzimeve të vërejtura në treg. Përdorimi i gazit është rritur ndjeshëm nga qytetarët si një alternativë më ekonomike përballë rritjes së çmimeve të hidrokarbureve të tjera,” bëhet me dije nga vendimmarrja e Bordit.