TIRANË — Policia e Tiranës ka njoftuar vendosjen e 37 masave administrative ndaj protestuesve gjatë tubimeve të zhvilluara përgjatë dy ditëve të fundit në kryeqytet.

Sipas njoftimit zyrtar të policisë, gjobat janë prerë ndaj personave që kanë bllokuar rrugën dhe kanë penguar qarkullimin e mjeteve në bulevardin "Dëshmorët e Kombit" gjatë protestave të datave 9 dhe 10 nëntor. Ndërhyrja administrative është mbështetur në Aktin Normativ nr. 5, ku secilit prej shtetasve u është vendosur masa administrative gjobë në vlerën e 5 000 lekëve për mospërputhje me thirrjet e përsëritura të efektivëve të rendit.