TIRANË — Deputetja e Partisë Socialiste për qarkun e Elbasanit, Sara Mila, është paraqitur mëngjesin e kësaj të mërkure në ambientet e Prokurorisë së Posaçme (SPAK), ku u pyet nga prokurori Bledar Maksuti në kuadër të hetimit për dyshime mbi korrupsionin në zgjedhje.

Pas daljes nga zyrat e SPAK-ut, deputetja e mazhorancës bëri një deklaratë për gazetarët ku sqaroi se ishte thirrur në cilësinë e personit që ka dijeni për rrethanat e çështjes dhe se kishte dhënë dëshminë e saj përpara hetuesve.

"Ky kalvar i gjatë hedhje balte do të përfundojë. Jam person në dijeni, kam dhënë dëshminë time. Sa herë SPAK dhe organet e drejtësisë të kenë nevojë për fjalën time, do jem këtu sa herë të jetë e nevojshme, si një njeri që beson tek ligji," u shpreh Sara Mila për mediat.