RINAS — Shërbimet e Policisë Kufitare në Aeroportin e Rinasit kanë vënë në pranga dy shtetas të shpallur në kërkim, gjatë kontrolleve dhe verifikimeve të kryera në hyrje dhe dalje të Republikës së Shqipërisë.

Në dalje të vendit u kap dhe u arrestua me qëllim ekstradimin drejt Turqisë shtetasi turk Enes Uguz, 31 vjeç. I riu ishte shpallur në kërkim ndërkombëtar nga Interpol Ankara, pasi Gjykata e Gebzes kishte lëshuar urdhërarrest ndaj tij për veprën penale të mashtrimit gjatë ushtrimit të veprimtarisë tregtare. Interpol Tirana po vijon procedurat në bashkëpunim me autoritetet turke për dorëzimin e tij.

Ndërkohë, në hyrje të Rinasit u ndalua shtetasi shqiptar Edison Vukaj, 27 vjeç. Ai rezultonte i shpallur në kërkim mbasi Gjykata e Tiranës e kishte dënuar me 3 vjet e 4 muaj burgim për veprën penale "Vjedhja me dhunë", kryer në bashkëpunim.

Njoftimi: 

Rinas/Kontrolle dhe verifikime nga shërbimet e Policisë Kufitare, vihen në pranga 2 shtetas në kërkim.

-Kapet dhe arrestohet me qëllim ekstradimin, 1 shtetas i akuzuar nga autoritetet turke, për mashtrim.

-Kapet dhe ndalohet 1 shtetas në kërkim, i dënuar me 3 vjet e 4 muaj burgim, për veprën penale “Vjedhja me dhunë”.

Shërbimet e Policisë Kufitare Rinas, në vijim të punës për kapjen e shtetasve të shpallur në kërkim dhe si rezultat i shkëmbimit të informacionit me Interpol Tiranën, kanë bërë të mundur kapjen në dalje të RSh-së dhe arrestimin e shtetasit turk të shpallur në kërkim ndërkombëtar:

-E. U., 31 vjeç, banues në Turqi.

Ky shtetas ishte shpallur në kërkim ndërkombëtar nga Interpol Ankara, Turqi, pasi Gjykata Penale e Shkallës së Parë Nr. 2 e Gebzes, Turqi, më datë 31.07.2026, ka lëshuar urdhër arresti për të, për veprën penale “Mashtrimi i kryer gjatë ushtrimit të veprimtarisë tregtare nga një tregtar, nga një drejtor i një shoqërie tregtare ose nga një person që vepron në emër të një shoqërie, ose nga një drejtues i një kooperative në kuadër të veprimtarisë së koperativës”.

Interpol Tirana, në bashkëpunim me autoritetet turke, po kryen procedurat për ekstradimin e këtij shtetasi, në Turqi.

-Gjithashtu, shërbimet e Policisë Kufitare kapën në hyrje të RSh-së, shtetasin në kërkim E. V., 27 vjeç.

Ky shtetas ishte shpallur në kërkim pasi Gjykata e Shkallës së Parë e Juridiksionit të Përgjithshëm Tiranë, me vendimin e datës 03.06.2025, e ka dënuar me 3 vjet e 4 muaj burgim, për veprën penale "Vjedhja me dhunë”, kryer në bashkëpunim.